იმერეთი უკრაინაში მიმდინარე საომარი მოქმედებებისას დაზარალებულთა ოჯახებიდან საქართველოში სტუმრად მყოფ ბავშვებს მშობლებთან ერთად მასპინძლობს. ინფორმაციას სამხარეო ადმინისტრაცია ავრცელებს.
ადმინისტრაციის ცნობით, იმერეთში სახელმწიფო რწმუნებული ზვიად შალამბერიძე სტუმრებს შეხვდა და რეგიონის მასშტაბით დაგეგმილი ტურის შესახებ დეტალური ინფორმაცია მიაწოდა.
„30-ზე მეტი უკრაინელი ომით დაზარალებული სტუმარი იმერეთის ისტორიულ, კულტურულ და ეთნოგრაფიულ თავისებურებებს გაეცნობიან. ტურის ფარგლებში ესტუმრებიან მოწამეთასა და გელათის მონასტრებს, პრომეთეს მღვიმეს და ბავშვებისთვის ჩატარდება იმერული კერძების მასტერკლასი.
საქართველოს პარლამენტის დიასპორისა და კავკასიის საკითხთა კომიტეტის, ასევე ქალაქ ოდესაში გენერალური კონსულის თორნიკე ბერეკაშვილის ინიციატივით, საქართველო 30-ზე მეტ უკრაინელ, ომით დაზარალებულ სტუმარს მასპინძლობს. ბავშვები და მათი აღმზრდელები ირპენის, ბუჩის, ხერსონის, სამხრეთ ოდესის მკვიდრნი არიან. ათი დღის განმავლობაში უკრაინელი ბავშვები და მათი აღმზრდელები საქართველოს სხვადასხვა კუთხეს სტუმრობენ“, – ნათქვამია გავრცელებულ ინფორმაციაში.