გვქონდა შეხვედრა პორტუგალიის პარლამენტის თავმჯდომარესთან, საგარეო ურთიერთობათა და ევროპულ საქმეთა კომიტეტების წარმომადგენლებთან. გვაქვს აბსოლუტური მხარდაჭერა პორტუგალიის პარლამენტის წარმომადგენლების მხრიდან. ჩვენთვის საინტერესოა მათი დახმარება და გამოცდილება, მნიშვნელოვანია მხარდაჭერა, რომელსაც ჩვენ მათგან ვგრძნობთ,– ამის შესახებ საქართველოს პარლამენტის თავმჯდომარე შალვა პაპუაშვილმა განაცხადა, რომელიც საპარლამენტო დელეგაციასთან ერთად, პორტუგალიაში ვიზიტით იმყოფება.
შალვა პაპუაშვილის თქმით, შეხვედრებზე საუბარი შეეხო საქართველოს მიერ 12 რეკომენდაციის შესრულების პროცესს, ისაუბრეს პორტუგალიის ევროკავშირში გაწევრიანების გზაზე.
როგორც პარლამენტის თავმჯდომარემ აღნიშნა, პორტუგალია საქართველოს მნიშვნელოვანი პარტნიორია.
მისივე თქმით, მხარეები შეთანხმდნენ, რომ პარლამენტებს შორის ურთიერთობა კიდევ უფრო ინტენსიური გახდება, რათა პორტუგალიის მხარდაჭერით საქართველომ მიაღწიოს პროგრესს ევროინტეგრაციის გზაზე.
„გარდა ევროპული ინტეგრაციისა, პორტუგალია ჩვენი მნიშვნელოვანი პარტნიორია არაღიარების პოლიტიკაში პორტუგალიურენოვან ქვეყნებთან ურთიერთობაში. ამ მხრივ, ჩვენ ყოველთვის ვგრძნობდით პრაქტიკულ დახმარებას მათი მხრიდან და ესეც, რა თქმა უნდა, ასე გაგრძელდება. ამიტომ, მნიშვნელოვანია, რომ ჩვენ პარლამენტებს შორის ურთიერთობა კიდევ უფრო მჭიდრო გახდეს. მეგობრობის ჯგუფი ახლა უკვე დაკომპლექტდა პორტუგალიის პარლამენტში. დარწმუნებული ვარ, მეგობრობის ჯგუფებს და კომიტეტებს შორის ურთიერთობების მეშვეობით ჩვენ გვექნება ინფორმაციის ინტენსიური გაცვლა, რათა ეს ძალიან დიდი მხარდაჭერა, რომელიც არის პორტუგალიისგან, დარჩეს ასეთად და მათი დახმარებით მივაღწიოთ იმ პროგრესს, რომელიც მნიშვნელოვანია ჩვენი ქვეყნისთვის“, – განაცხადა შალვა პაპუაშვილმა.