უკრაინის ხელისუფლების ოფიციალურმა პირებმა, მათ შორის უშიშროების საბჭოს მდივანმა საჯაროდ განაცხადა, რომ მათი სურვილი იყო, საქართველოში გახსნილიყო მეორე ფრონტი, – ამის შესახებ საქართველოს პრემიერ-მინისტრმა, ირაკლი ღარიბაშვილმა განაცხადა.
როგორც მთავრობის მეთაურმა განაცხადა, როგორც ამ ქვეყნის პრემიერ-მინისტრი, ვალდებულია დაიცვას ქვეყნის ინტერესები და ამას აკეთებს კიდეც.
„ძალიან ბევრი რამ ითქმის საჯაროდ, ბევრი რამ არ ითქმის, მაგრამ ერთი რამ მინდა შევახსენო ყველას, უკრაინის ხელისუფლების ოფიციალურმა პირებმა, მათ შორის უშიშროების საბჭოს მდივანმა საჯაროდ განაცხადა, რომ მათი სურვილი იყო, რომ საქართველოში გახსნილიყო მეორე ფრონტი, რომ არ მხოლოდ უკრაინელი ბავშვები და ქალები დაიხოცონ, არამედ ქართველებიც. ეს ფრონტი და ომი უნდა გადავიდეს საქართველოშიცო. ეს იყო მისი ოფიციალური განცხადება. გარდა ამისა, ჩვენ ძალიან ბევრი ანალოგიური შინაარსის განცხადება მოვისმინეთ და კიდევ უფრო მეტი ინფორმაცია ვიცით, რაც სამწუხაროდ, არ ითქმის საჯაროდ, მაგრამ მადლობა ღმერთს, საქართველოში არის მმართველი პარტია „ქართული ოცნება“ და ჩვენ ყველანი ხელისუფლება, ვინც გადავწყვიტეთ, რომ ჩვენთვის მთავარი, უზენაესი არის ჩვენი ხალხის, ჩვენი ქვეყნის ინტერესები. ჩვენ ყველა ქვეყანას, ყველა ხალხს პატივს ვცემთ, მაგრამ ყველაზე მეტად გვიყვარს ჩვენი ქვეყანა და ყველაზე მეტად დავიცავთ ჩვენი ქვეყნის ინტერესებს. მე, როგორც ამ ქვეყნის პრემიერ-მინისტრი, პირველ რიგში ვარ ვალდებული, რომ დავიცვა ჩვენი ქვეყნის ინტერესები და ამას ვაკეთებ კიდეც“, – განაცხადა ირაკლი ღარიბაშვილმა.