მიხეილ სააკაშვილი ხვალისთვის დანიშნულ სხდომას, სავარაუდოდ, ონლაინრეჟიმში ჩაერთვება – სასამართლოს განკარგულების შემდეგ ნებართვა უკვე კლინიკამ უნდა გასცეს.
სავარაუდოდ, დაკითხვის დროს გახდება ცნობილი ის დიაგნოზები, რის საფუძველზეც დაცვის მხარე სასჯელისგან გათავისუფლებას, ან გადავადებას ითხოვს.
დღეს პოლიტიკური კომენტარების თემა გახდა მიხეილ სააკაშვილისთვის ელექტრო სიგარეტის შეზღუდვა. იუსტიციის სამინისტროს ცნობით, გადაწყვეტილების მიღების მიზეზი გახდა ის, რომ ყოფილი პრეზიდენტი დიდი რაოდენობით ელექტრო სიგარეტს იღებდა.
ამ საკითხზე განმარტებები ადვოკატმაც გააკეთა. შალვა ხაჭაპურიძემ აღნიშნა, რომ კუჭის ოპერაცია ექსპრეზიდენტს ხუთი წლის წინ აქვს გაკეთებული და გამორიცხულია, წონის კლება ამ ფაქტს უკავშირდებოდეს.
“ძალიან რთული მდგომარეობა დამხვდა, ნახევრად გათიშულ მდგომარეობაში იყო და რაღაც გარკვეული პერიოდი დამჭირდა რომ გონზე მომეყვანა. საუბრობდა მძიმედ, შესვენებებით, უჭირდა, ერთი-ორჯერ გაითიშა კიდეც საუბრის დროს, რაღაც გონების კარგვის მსგავსი მომენტი იყო. ასე თქვა რომ შეეცდება თქვას რაღაც, თუ შეძლო რა თქმა უნდა, მაგრამ თუ ასეთ მდგომარეობაში იყო როგორშიც დღეს რაიმეს თქმა გაუჭირდება, ჩართვით ჩაერთვება. რაიმე განცხადების ან ჩვენების მიცემა გაუჭირდება.
ელექტროსიგარეტი აკრძალული აქვს უკვე საერთოდ რამდენიმე დღეა, რატომ არ ვიცი, ესეც სიმართლე გითხრათ არაადამიანური მოპყრობის ერთ-ერთი ნიმუშია, იმიტომ რომ წარმოუდგენელია მწეველი და უცებ შეუწყვიტო ეს ყველაფერი.
თუ რაიმეზე ეჭვი აქვთ აიღონ მოსამართლის განჩინება და დედამიწის ზურგზე ნებისმიერი უწყებიდან შეუძლიათ გამოითხოვონ ნებისმიერი ინფორმაცია და დაამთავრონ ამით სპეკულირება. აინტერესებთ რამე? მოგვმართონ ჩვენ, თუ ჩვენ არ ვაძლევთ მაშინ მიმართონ და გამოითხოვონ,” – აცხადებს ხაჭაპურიძე.