იუსტიციის მინისტრის მოსმენის დროს შესაძლოა ოპოზიციის მხრიდან ადგილი ჰქონდეს გარკვეულ შოუს, – ამის შესახებ საპარლამენტო უმრავლესობის წევრმა ანრი ოხანაშვილმა განაცხადა. მისივე თქმით, შეკითხვები შეეხება მიხეილ სააკაშვილსაც, თუმცა, მეტად მნიშვნელოვანია, რას აკეთებს იუსტიციის სამინისტრო საზოგადოებისთვის.
„გვაქვს მოლოდინი, რომ იუსტიციის მინისტრის მოსმენისას, ოპოზიციის მხრიდან შესაძლოა, ადგილი ჰქონდეს გარკვეული შოუს მოწყობას. მათი ერთადერთი ინტერესი პატიმარი სააკაშვილია. რეალურად არ აინტერესებთ სააკაშვილს რა სერვისები მიეწოდება, როგორ უზრუნველყოფს ეს კონკრეტული უწყება მისთვის ყველა იმ პირობის შექმნას, რომელიც საჭიროა მისთვის. რა თქმა, უნდა იქნება ამ მიმართულებითაც შეკითხვები, თუმცა, ჩვენთვის მნიშვნელოვანია ის, რაც აინტერესებს ჩვენს საზოგადოებას. რა სერვისები უმჯობესდება ჩვენი მოქალაქეებისთვის, როგორ მიმდინარეობს მიწის რეგისტრაციის პროცესი, შშმ პირებისთვის რას აკეთებს იუსტიციის სამინისტრო, ევროინტეგრაციისთვის“, – აღნიშნა ოხანაშვილმა.