„ნაციონალური მოძრაობის“ წევრმა, თემურ ჯანაშიამ, ექიმების რეკომენდაციით, შიმშილობა შეწყვიტა, – ამის შესახებ ინფორმაცია საქართველოს პირველ არხს პარლამენტში დაუდასტურეს.
ამასთან, როგორც „ნაციონალურ მოძრაობაში“ აცხადებენ, თემურ ჯანაშია საავადმყოფოშია გადაყვანილი.
პარლამენტში მოშიმშილე დეპუტატებიდან დღეს შიმშილობა შეწყვიტა „ნაციონალური მოძრაობის“ წევრმა, დავით კირკიტაძემ. ჯანმრთელობის მდგომარეობის გაუარესების გამო, კირკიტაძეს ექიმებმა შიმშილობის გაგრძელების რეკომენდაცია აღარ მისცეს. ამავე მიზეზით კი 18 დეკემბერს შეწყვიტა შიმშილობა აბდულა ისმაილოვმაც.
„ნაციონალური მოძრაობის“ წევრებმა, ანა წითლიძემ, დავით კირკიტაძემ და აბდულა ისმაილოვმა პარლამენტში, მიხეილ სააკაშვილის საზღვარგარეთ გადაყვანის მოთხოვნით, შიმშილობა 15 დეკემბერს დაიწყეს. მათ 16 დეკემბერს შეუერთდა ამავე პარტიის წევრი თემურ ჯანაშია.
რაც შეეხება კიდევ ერთ მოშიმშილე დეპუტატს, ანა წითლიძეს, ის შიმშილობას აგრძელებს.
ამასთან, საკანონმდებლო ორგანოში 24-საათიან რეჟიმში იმყოფებიან ექიმები, რომლებიც მოშიმშილეს მუდმივ მონიტორინგს უწევენ.