ახლა პარლამენტიდან გამოხვიდე და ისევ „ფეისბუქზე“ აკაკუნო ან ოფისში დაჯდე, მე ამის აზრს ვერ ვხედავ, – ამის შესახებ „ნაციონალური მოძრაობის“ თავმჯდომარეობის კანდიდატმა, გიორგი მუმლაძემ, ნონა მამულაშვილისა და გიორგი ხვედელიანის ინიციატივის შეფასებისას განაცხადა.
ნონა მამულაშვილი და გიორგი ხვედელიანი ინიციატივით გამოდიან, „ნაციონალური მოძრაობის“ თავმჯდომარის არჩევნებს დაემატოს კითხვა, უნდა დატოვოს თუ არა ენმ-მ პარლამენტი.
მუმლაძის თქმით, აღნიშნული საკითხის „ნაციონალური მოძრაობის“ თავმჯდომარის არჩევნებთან მიბმა უაზრობაა.
„2020 წლის არჩევნები როდესაც ჩატარდა და დაიდო გაყალბების ფაქტები, რომლის გამოკვლევაშიც ჩვენ ვმონაწილეობდით, იმ დღიდან ვაპროტესტებთ და ვითხოვდით, ვადამდელი არჩევნები დანიშნულიყო. კარვებში ვიწექით და მაშინ, მათ შორის, იმ დეპუტატებმა, რომლებიც პარლამენტში შევიდნენ, ქუჩაში მყოფ ხალხს გადაგვაბიჯეს. ამიტომ ამ არჩევნებთან ამ საკითხის მიბმა, მგონია, რომ ცოტა უაზრობაა. ამ საკითხის არჩევნებთან მიბმა არასწორი მგონია, რადგან ეს თავიდანვე არალეგიტიმური პარლამენტი იყო, თავიდანვე არ უნდა შესულიყვნენ. დეპუტატები თუ აპირებენ, რომ გამოვიდნენ პარლამენტიდან, მაშინ უნდა გამოვიდნენ ქუჩაში და დაიწყონ ბრძოლა. ახლა პარლამენტიდან გამოხვიდე და ისევ „ფეოსბუქზე“ აკაკუნო ან ოფისში დაჯდე, ამ ამბავში მე აზრს ვერ ვხედავ. ახლა მთავარი საკითხია მიშას თავისუფლების, სიცოცლის და ჯანმრთელობის გადარჩენა. მეორეს მხრივ, მნიშვნელოვანია, რომ ამ პარტიაში არჩევნები ჩატარდეს დემოკრატიულად, რათა პარტია უბრალოდ გაძლიერდეს და პროცესს ჰქონდეს მაღალი ლეგიტიმაცია“, – განაცხადა მუმლაძე.
ამასთან, მუმლაძე გამორიცხავს, რომ დაპირისპირების შედეგად „ნაციონალური მოძრაობა“ დაიშალოს.
„არავითარ შემთხვევაში არ დაიშლება „ნაციონალური მოძრაობა“, რადგან ის არის შექმნილი და შეკრული მიხეილ სააკაშვილის იდეების გარშემო. ეს იდეები ვისაც არ მოსწონს და ვერ არის მასთან თანხვედრაში, ალბათ ისინი გაიწევიან ამ პარტიიდან, როგორც თავის დროზე გაიწია ის ხალხი, რომლებიც წავიდნენ და თქვეს, რომ არ მოსწონთ„ნაციონალური მოძრაობა“. სამწუხაროდ, მათ ძალიან ცუდი რამ დაემართათ პოლიტიკურად, ელექტორული თვალსაზრისით“, – განაცხადა მუმლაძემ.