2022 წლის 22 დეკემბერს ამოქმედდა საარჩევნო კოდექსში შესული ცვლილებები, რომლის თანახმადაც, საქართველოში არჩევნები უნდა გაიმართოს ელექტრონული საშუალებების გამოყენებით, რაც გულისხმობს ამომრჩეველთა რეგისტრაციას, ხმის მიცემას, ხმის დათვლას და კენჭისყრის შედეგების შემაჯამებელი ოქმის შედგენის პროცედურებს ელექტრონული საშუალებების გამოყენებით. ასევე, კანონით სავალდებულო გახდა ელექტრონული საშუალებების გამოყენებით ჩატარებული არჩევნების აუდიტი.
კანონის თანახმად, არჩევნებში მონაწილეობის შესაძლებლობა ელექტრონული საშუალებების გამოყენებით, უნდა ჰქონდეს საქართველოს ამომრჩეველთა არანაკლებ 70 პროცენტს (2022 წლის პირველი ნოემბრის მდგომარეობით, ამომრჩეველთა საერთო რაოდენობა შეადგენს 3 470 407-ს).
კანონის ამავე ნორმების შესაბამისად, განისაზღვრა, რომ არჩევნებში ელექტრონული საშუალებები, აგრეთვე მათი გამოყენების წესი და პირობები მტკიცდება ცესკოს დადგენილებით, ხოლო აუდიტის ჩატარების წესს განკარგულებით ამტკიცებს ცესკო.
საარჩევნო კანონმდებლობის თანახმად, 2023 წლის აპრილში უნდა გაიმართოს საქართველოს პარლამენტის შუალედური, ორი მუნიციპალიტეტის მერის რიგგარეშე და რამდენიმე საკრებულოს შუალედური არჩევნები. ხსენებული არჩევნები ინიშნება კენჭისყრის დღემდე არანაკლებ ორი თვით ადრე. აღნიშნული არჩევნებიც, საერთო არჩევნებისათვის დადგენილი წესით, ელექტრონული საშუალებების გამოყენებით უნდა ჩატარდეს. ცესკოს 2023 წლის 6 თებერვლის გადაწყვეტილებით 2023 წლის აპრილში გასამართი არჩევნები ტარდება 10 ოლქში, 164 საარჩევნო უბანზე, საიდანაც 117 საარჩევნო უბანზე არჩევნები ელექტრონული საშუალებების გამოყენებით უნდა ჩატარდეს, რაც მოიცავს აპრილში გასამართ არჩევნებში მონაწილე ამომრჩეველთა 91% პროცენტს, დაახლოებით 185 000 ამომრჩეველს.
ცესკოს მიერ 2023 წლის 6 თებერვალს მიღებულ იქნა N7/2023 დადგენილება „კენჭისყრის ელექტრონული საშუალებების გამოყენებით ჩატარების წესისა და პირობების განსაზღვრის შესახებ“, რომელიც დეტალურად აღწერს შესაბამის პროცედურებს. ამ დადგენილების შესაბამისად, ზემოხსენებული შუალედური და მერის რიგგარეშე არჩევნები და 2024 წელს გასამართი საპარლამენტო არჩევნებიც ჩატარდება ამავე დადგენილებით განსაზღვრული წესითა და პირობებით. ზემოაღნიშნული დადგენილება დანართის სახით თან ერთვის წინამდებარე განცხადებას.
2023 წლის აპრილში გასამართი შუალედური/რიგგარეშე არჩევნების ჩატარებისა და სწავლების მიზნით საქართველოს საარჩევნო ადმინისტრაციას ესაჭიროება 840 ერთეული ამომრჩეველთა ვერიფიკაციის მოწყობილობა, 520 ერთეული ხმის მთვლელი მოწყობილობა და ბიულეტენების ყუთი (თავსახურით), ასევე შედეგების გადაცემის პროგრამული უზრუნველყოფა.
ყოველივე ზემოაღნიშნულიდან გამომდინარე, ცენტრალური საარჩევნო კომისია, პოტენციური მომწოდებლის დადგენის მიზნით, ბაზრის კვლევაში მონაწილეობისთვის იწვევს საარჩევნო ტექნოლოგიების მწარმოებელ კომპანიებს, შემდეგი სავალდებულო პირობების გათვალისწინებით:
განმცხადებლის საკვალიფიკაციო პირობები:
განმცხადებელი უნდა იყოს კერძო სამართლის, დამოუკიდებელი სამეწარმეო სუბიექტი, რომლის წილს (სრულად ან ნაწილობრივ) არ უნდა ფლობდეს (პირდაპირ ან ირიბად) რომელიმე უცხო ქვეყნის ცენტრალური/ფედერალური, რეგიონული ან ადგილობრივი მთავრობა.
განმცხადებელი უნდა იყოს შემოთავაზებული საარჩევნო ტექნოლოგიების მწარმოებელი, რომლის პროგრამულ უზრუნველყოფაზე და აპარატურაზე ინტელექტუალური საკუთრება სრულად ეკუთვნის განმცხადებელს.
განმცხადებელი სერტიფიცირებული უნდა იყოს ISO სტანდარტით. განმცხადებელს უნდა გააჩნდეს მოქმედი ISO 9001:2015, ISO 14001:2015, და ISO 27001:2013 სერტიფიკატები, საარჩევნო ტექნოლოგიებთან დაკავშირებული პროგრამული უზრუნველყოფის და აპარატურის მიწოდებისა, და ავტომატიზებული საარჩევნო სერვისების მიწოდების სფეროში.
განმცხადებელს, ამომრჩეველთა ვერიფიკაციისა და ხმის დათვლის მიზნებისთვის შექმნილი სპეციალური ტექნოლოგიების მეშვეობით, ბოლო 5 წლის განმავლობაში ეროვნულ, რეგიონულ, ან მუნიციპალურ არჩევნებში განხორციელებული უნდა ჰქონდეს არანაკლებ 2 ტექნოლოგიური არჩევნების პროექტი, რომელიც მოიცავდა ამომრჩეველთა იმ რაოდენობას, რაც თითოეული არჩევნებისთვის შეესაბამება საქართველოს ამომრჩეველთა რაოდენობის არანაკლებ 70%-ს (2 429 285 ამომრჩეველი).
განმცხადებელმა უნდა წარმოადგინოს არანაკლებ 2 რეკომენდაცია არანაკლებ 2 სხვადასხვა ქვეყნიდან, ბოლო 5 წლის განმავლობაში განხორციელებული ტექნოლოგიური არჩევნების პროექტების თაობაზე, რომელშიც გამოყენებული იყო ამომრჩეველთა ვერიფიკაციისა და ბიულეტენების ელექტრონული დათვლის მიზნებისთვის შექმნილი სპეციალური ტექნოლოგიები, ეროვნულ, რეგიონულ ან მუნიციპალურ არჩევნებში, რომელიც მოიცავდა ამომრჩეველთა იმ რაოდენობას, რაც თითოეული არჩევნებისთვის შეესაბამება საქართველოს ამომრჩეველთა რაოდენობის არანაკლებ 70%-ს (2 429 285 ამომრჩეველი).
საარჩევნო ტექნოლოგიები მსოფლიოს მრავალ ქვეყანაში აღიარებულია კრიტიკულ ინფრასტრუქტურად, შესაბამისად მისი დანერგვა მოითხოვს ხარისხის უმაღლეს სტანდარტს. ზემოაღნიშნულის გათვალისწინებით, განმცხადებელმა საკუთარი შესაძლებლობა უნდა დაადასტუროს მისი პროგრამული უზრუნველყოფისა და აპარატურის სულ ცოტა ერთი ქვეყნის სახელისუფლებო არჩევნებში გამოყენების შეფასების დოკუმენტით, რომელიც გაცემული უნდა იყოს საერთაშორისო აუდიტორული კომპანიის ანდა შესაბამისი ქვეყნის საარჩევნო ადმინისტრაციის მიერ.
შეთავაზების სავალდებულო პირობები:
განმცხადებლის წინადადება უნდა მოიცავდეს ტექნოლოგიური არჩევნების ყველა მითითებულ კომპონენტს: ამომრჩეველთა ვერიფიკაციას, ხმის დათვლას, შედეგების გადაცემასა და ტექნოლოგიური არჩევნების მართვის მომსახურებას.
შემოთავაზებული მოწყობილობები (აპარატები) უნდა იყოს ახალი და გამოუყენებელი.
ამომრჩეველთა ვერიფიკაცია შეიძლება განხორციელდეს მხოლოდ საარჩევნო მიზნებისთვის შექმნილი სპეციალური პროგრამული უზრუნველყოფისა და აპარატურის საშუალებით. შემოთავაზებულ აპარატს უნდა გააჩნდეს ციფრულ მონაცემთა წაკითხვის და ბეჭდვის ინტეგრირებული კომპონენტები. იმ საარჩევნო უბანში, სადაც საჭირო იქნება ერთზე მეტი მოწყობილობის გამოყენება, მოწყობილობები უნდა მუშაობდეს სინქრონულ რეჟიმში. ვერიფიკაციის მოწყობილობა არცერთ ეტაპზე არ უნდა იყენებდეს ინტერნეტს, ან/და ინფორმაციის გაცვლის უსადენო კავშირს. ვერიფიკაციის მოწყობილობა და მისი პროგრამული უზრუნველყოფა თავსებადი უნდა იყოს საარჩევნო ადმინისტრაციის არსებულ მონაცემთა ბაზებთან (მონაცემები განთავსებულია MSSQL სისტემაში, რომლის მიწოდებაც აპარატებში განსათავსებლად უნდა მოხდეს შუალედური სერვერის გამოყენებით). ცესკოს უნდა გადაეცეს უვადო პროგრამული უზრუნველყოფის ლიცენზია საარჩევნო ადმინისტრაციისათვის გადაცემულ ყველა შესაბამის მოწყობილობაზე.
ხმის დათვლა შეიძლება განხორციელდეს მხოლოდ საარჩევნო მიზნებისთვის შექმნილი სპეციალური პროგრამული უზრუნველყოფისა და აპარატურის საშუალებით, რომელიც იყენებს ოპტიკური ნიშნების ამოცნობის ტექნოლოგიას (OMR technology). შემოთავაზებულ აპარატს უნდა გააჩნდეს ქაღალდის ბიულეტენის სკანირების, ხმების დათვლის, შედეგების შეჯამებისა და ბეჭდვის ინტეგრირებული კომპონენტები. ხმის მთვლელი მოწყობილობა მყარად უნდა მაგრდებოდეს ბიულეტენების შესანახ ყუთზე და თავსებადი იყოს მასთან და მისი მოცულობა უნდა იყოს 200-220 ლიტრის ფარგლებში, ხოლო გამჭვირვალობა 30-35%-ის ფარგლებში. იმ საარჩევნო უბანში, სადაც საჭირო იქნება ერთზე მეტი ხმის მთვლელი მოწყობილობის გამოყენება, მოწყობილობებს უნდა ჰქონდეს კონსოლიდირებული შედეგების ბეჭდვის შესაძლებლობა. ხმის მთვლელი მოწყობილობა არცერთ ეტაპზე არ უნდა იყენებდეს ინტერნეტს, ან/და ინფორმაციის გაცვლის უსადენო კავშირს. ცესკოს უნდა გადაეცეს უვადო პროგრამული უზრუნველყოფის ლიცენზია საარჩევნო ადმინისტრაციისათვის გადაცემულ ყველა შესაბამის მოწყობილობაზე.
შედეგების გადაცემა შეიძლება განხორციელდეს მხოლოდ საარჩევნო მიზნებისთვის შექმნილი სპეციალური პროგრამული უზრუნველყოფის საშუალებით, მას შემდეგ, რაც ხმის დათვლის აპარატიდან ამოიბეჭდება კენჭისყრის შედეგები. შედეგების გადაცემის პროგრამა უნდა მოიცავდეს ციფრულ მონაცემთა წაკითხვის, კენჭისყრის შემაჯამებელი ოქმის სკანირებისა და მონაცემთა გადაცემის (საარჩევნო უბნიდან ცესკოს სერვერზე) ინტეგრირებულ კომპონენტებს. შედეგების გადაცემის პროგრამული უზრუნველყოფა თავსებადი უნდა იყოს საარჩევნო ადმინისტრაციის არსებულ მონაცემთა ბაზებთან (MSSQL). ცესკოს უნდა გადაეცეს უვადო პროგრამული უზრუნველყოფის ლიცენზია.
მომსახურება უნდა მოიცავდეს: ცესკოს ზედამხედველობით საარჩევნო მონაცემთა დამუშავებას და მართვას საქართველოში; ტექნოლოგიების მართვის ცენტრისა და საწყობის დაგეგმარებას და გეგმის შესაბამისად ტექნიკურ ზედამხედველობას; არჩევნების პერიოდში, ყველა ეტაპზე და ყველა დონეზე, სათანადო ტექნიკური დახმარების უზრუნველყოფას; საარჩევნო ადმინისტრაციის თანამშრომლების, მათ შორის, კომისიის წევრებისა და ტექნიკური თანამშრომლების გადამზადებას; ტრენინგებისა და ტექნიკური ოპერაციების სახელმძღვანელოების შექმნას ქართულ ენაზე; ამომრჩეველთა ცნობიერების ამაღლების სტრატეგიის შემუშავებას; სტრატეგიული კომუნიკაციის გეგმის შემუშავებას; ავტომატიზებული არჩევნების მართვის სხვა საკითხებში ცესკოსთვის კონსულტაციის გაწევას.
ხსენებული მომსახურების უზრუნველსაყოფად (ამომრჩეველთა ვერიფიკაცია, ხმის დათვლა და შედეგების გადაცემა) მონაცემთა დამუშავებისთვის და მართვისთვის განმცხადებელმა უნდა გამოიყენოს მხოლოდ ცესკოს სასერვერო ინფრასტრუქტურა.
შემოთავაზებული საარჩევნო ტექნოლოგიები სრულად უნდა შეესაბამებოდეს საქართველოს საარჩევნო კანონმდებლობას და „ლოკალიზებული“ უნდა იყოს ქართულ ენაზე.
შემოთავაზებული მოწყობილობები უნდა მუშაობდეს 220 ვოლტზე და თან ახლდეს ძაბვის კაბელი ევროპული სტანდარტის შემაერთებელი ჩანგლით.
შემოთავაზებული მომსახურება უნდა განხორციელდეს განმცხადებლის ადამიანური და მატერიალური რესურსით საქართველოში. პროექტის განმახორციელებელი გუნდი და ადგილობრივი ქვეკონტრაქტორები ექვემდებარებიან საქართველოს საარჩევნო ადმინისტრაციასთან შეთანხმებას.
განმცხადებლის მიერ შემოთავაზებული პროგრამული უზრუნველყოფა და აპარატურა უნდა იყოს ცესკოს მოთხოვნების შესაბამისი და ერთხელ მაინც უნდა იყოს გამოყენებული რომელიმე ქვეყნის ეროვნულ, რეგიონულ, ან მუნიციპალურ არჩევნებში, რომელიც ფარავდა შესაბამისი ქვეყნის ამომრჩეველთა არანაკლებ 70%-ს.
განმცხადებელმა ცესკოს უნდა წარუდგინოს შემოთავაზებული ტექნოლოგიური გადაწყვეტების აღწერილობა და ტექნიკური მახასიათებლები, ასევე ამ ტექნოლოგიების გამოყენების სრული პროცესის აღწერა.
განცხადების წარდგენის წესი და პირობები:
განმცხადებელმა საკუთარი შეთავაზება უნდა წარადგინოს ინგლისურ ან ქართულ ენაზე, კომპანიის ოფიციალურ ბლანკზე. წინადადებას ხელს უნდა აწერდეს კომპანიის უფლებამოსილი თანამდებობის პირი.
განცხადებას თან უნდა ერთოდეს ზემოაღნიშნულ პირობებთან შესაბამისობის დამადასტურებელი ყველა სათანადო დოკუმენტური მტკიცებულებები. მოთხოვნის შემთხვევაში განმცხადებელმა ცესკოს უნდა წარუდგინოს ზემოაღნიშნული დოკუმენტების დედნები.
განცხადება და დანართი დოკუმენტები წარდგენილი უნდა იქნეს ელექტრონულად, ელ-ფოსტის მისამართზე: techresearch@cec.gov.ge
განცხადების წარდგენის ბოლო ვადაა 2023 წლის 21 თებერვალი, საქართველოს დროით 18:00 საათი.
ზემოაღნიშნული ვადისა და პირობების დარღვევით მიღებული წინადადებები არ განიხილება.
მიწოდების ვადები და პირობები:
ცესკოს მოთხოვნიდან 2 დღის ვადაში განმცხადებელმა უნდა უზრუნველყოს შემოთავაზებული წინადადების ბიუჯეტის წარდგენა.
ცესკოს მოთხოვნიდან 3 დღის ვადაში (სავარაუდოდ 1-3 მარტი) განმცხადებელმა უნდა უზრუნველყოს საქართველოს საარჩევნო კანონმდებლობასთან შესაბამისობაში მყოფი შემოთავაზებული საარჩევნო ტექნოლოგიების სრული დემონსტრაცია ცესკოში.
ხელშეკრულების გაფორმების შემთხვევაში, არაუგვიანეს 2023 წლის 10 მარტისა განმცხადებელმა უნდა უზრუნველყოს, მომსახურების განმახორციელებელი გუნდის საქართველოში ბაზირება და ტექნოლოგიური არჩევნების მართვის პროცესის დაწყება.
ხელშეკრულების გაფორმების შემთხვევაში, არაუგვიანეს 2023 წლის 13 მარტისა განმცხადებელმა უნდა უზრუნველყოს, შემოთავაზებული პროგრამული უზრუნველყოფის და აპარატურის ცესკოსთვის სრულად მიწოდება, საქართველოში.
ხელშეკრულების გაფორმების შემთხვევაში, განმცხადებელი საქართველოში ბაზირების მომდევნო დღიდან – 2023 წლის 11 მარტიდან, მზად უნდა იყოს, განსაზღვრული გრაფიკის შესაბამისად, უზრუნველყოს ტრენერთა ტრენინგის განხორციელება. ამავე ვადებში, განმცხადებელმა უნდა მოახდინოს ტექნიკურ საკითხებთან დაკავშირებით შესაბამისი ტრენერების გადამზადება, ასევე, განსაზღვრული გრაფიკის შესაბამისად.
შესყიდული საქონლისა და მომსახურების ღირებულების ანაზღაურებას ცესკო უზრუნველყოფს შესაბამისი საქონლისა და მომსახურების მიწოდების შემდეგ; საავანსო ანგარიშსწორება არ განიხილება.
ხელშეკრულების გაფორმების შემთხვევაში, მომწოდებელმა უნდა წარმოადგინოს ხელშეკრულების შესრულების საბანკო გარანტია, ხელშეკრულების საერთო ღირებულების 5%-ის ოდენობით.
შემოთავაზებულ აპარატებზე უნდა ვრცელდებოდეს გარანტია, რომელიც მოქმედი იქნება არანაკლებ მიღება-ჩაბარების გაფორმების დღიდან 18 თვის განმავლობაში.
ცენტრალური საარჩევნო კომისია იტოვებს უფლებას არ უპასუხოს განმცხადებლის ისეთი შინაარსის კითხვებს, რომელმაც შეიძლება საფრთხე შეუქმნას საარჩევნო ადმინისტრაციის ინფორმაციულ უსაფრთხოებას, ან გამოიწვიოს პერსონალური, სამსახურებრივი, ან კომერციული ინფორმაციის გამჟღავნება.
ცენტრალური საარჩევნო კომისია შეეხმიანება მხოლოდ იმ განმცხადებლებს ვინც სრულად აკმაყოფილებს ზემოაღნიშნულ პირობებს.
ცენტრალური საარჩევნო კომისია უფლებას იტოვებს არ განახორციელოს საარჩევნო ტექნოლოგიების შესყიდვა იმ შემთხვევაში, თუ ვერ დარწმუნდება, რომ რომელიმე განმცხადებელი სრულად აკმაყოფილებს ზემოაღნიშნულ პირობებს.