უკრაინას აქვს თავისი გამოწვევები და ის სხვანაირად უყურებს და აღიქვამს სამყაროს. არის ომში და გასაგებია, რომ კონცენტრირებულია საკუთარ თავზე. თუმცა, ჩვენ არ გვაქვს ნაკლები ნაომარი და ნაბრძოლი. სამი ომი გვაქვს გამოვლილი, სადაც რუსეთი იყო ჩართული, – ამის შესახებ საქართველოს პარლამენტის თავმჯდომარემ შალვა პაპუაშვილმა აჭარის საზოგადოებრივი მაუწყებლის ეთერში განაცხადა.
როგორც პაპუაშვილმა აღნიშნა, საქართველოს რუსეთის წინააღმდეგ სამი ომი აქვს გამოვლილი და დღემდე რუსეთის მიერ საქართელოს ტერიტორიების ნაწილი ოკუპირებულია. პაპუაშვილის განცხადებით, საქართველო იყო ყველა რეზოლუციის თანაავტორი და მონაწილე უკრაინის მხარდასაჭერად.
,,ჩვენი ტერიტორიების ნაწილი ოკუპირებულია, ჩვენს ტერიტორიაზე რუსული ჯარია დღემდე განთავსებული. ჩვენ არაფერი დასამტკიცებელი არ გაქვს უკრაინის მიმართ და არც არავის მიმართ, ჩვენს პოლიტიკურ მდგომარეობასთან დაკავშირებით, ეს ჩვენ დავამტკიცეთ სამი ომით და ჩვენი სისხლით, რომელსაც არავისზე ნაკლები ფასი არ აქვს. ასე რომ საინფორმაციო, გარკვეულ ჩხვლეტებს ავიტანთ, ეს არ არის პრობლემა. მთავარი არის ერთი რამ, რომ ჩვენ ვართ კეთილსინდისიერი ჩვენს დამოკიდებულებაში ამ საკითხების მიმართ და კიდევ ერთხელ, ხაზს გავუსვამ, ჩვენმა საზოგადოებამაც რომ იცოდეს, თუ რას ნიშნავს საქართველოს პოზიცია. საქართველო ამ მთლიან ალიანსში, რომელიც უჭერს უკრაინას მხარს – ჩვენ ვიყავით ყველა რეზოლუციის მხარდამჭერი და ინიციატორი, მათ შორის ჰააგაში სისხლის სამართლის სასამართლოში განცხადების თანაავტორი, მოლდოვამ უარი თქვა თანაავტორობაზე. ჩვენ გაეროში რეზოლუციას მხარი დავუჭირეთ, თანასპონსორი ვიყავით. ევროსაბჭოდან რუსეთის გარიცხვის მონაწილე და მხარდამჭერი ვიყავით. თქვენ ხედავთ, როგორი პროპაგანდისტური ტალღაა სანქციების გვერდის ავლასთან დაკავშირებით და არცერთი ფაქტი, ეჭვის დონეზეც კი არ დადასტურდა,“– განაცხადა შალვა პაპუაშვილმა.