საპარლამენტო უმრავლესობის წარმომადგენელი მანანა კობახიძე “ნაციონალურ მოძრაობაში” მიმდინარე პროცესებს ეხმაურება.
გაზეთ “პრაიმტაიმთან” ინტერვიუში კობახიძე აღნიშნავს, რომ “ნაციონალების” ერთი ჯგუფი სააკაშვილის მემკვიდრეობისგან გათავისუფლებას ცდილობს.
“სააკაშვილი არის უცხო ქვეყნის მოქალაქე, რომელმაც საკუთარი სურვილით თქვა უარი საქართველოს მოქალაქეობაზე. ის უკრაინაში ჩაუდგა სათავეში ოპოზიციურ მოძრაობას. რანაირად შეიძლებოდა, რომ ის ამავდროულად „ნაციონალური მოძრაობის“ ლიდერიც ყოფილიყო. როგორც ჩანს, „ნაციონალური მოძრაობის“ რაღაც ნაწილს აქვს მცდელობა, რომ საბოლოოდ განთავისუფლდეს სააკაშვილის გავლენისგან და იმ საშინელი მემკვიდრეობისგან, რომელიც მისი მმართველობის დროს უკავშირდება. მათი გადაწყვეტილება გასაგებია და ლოგიკურია. ჩემი აზრით, ძირითადი საპარლამენტო გუნდი ამ დღეებში, ალბათ, მართლაც დატოვებს „ნაციონალურ მოძრაობას“, მაგრამ მათ არსენალში არის კიდევ ერთი პარტია – „ევროპული საქართველო“, რომელთან ერთადაც ბლოკის სახით წარდგნენ არჩევნებზე და სავარაუდოდ, ბოკერიას გუნდი სწორედ ამ პარტიაში გადაინაცვლებს. თუმცა ეს ცვლილებები, „ნაციონალური მოძრაობიდან“ გამოყოფა თუ განახლებული პარტიული სახელი, ჩემი აზრით, ამ გუნდს მაინც ვერ გაათავისუფლებს მძიმე პოლიტიკური წარსულისგან და საზოგადოების ნდობას ვერ მოაპოვებინებს”, – აცხადებს მანანა კობახიძე.
იგი არასერიოზულს უწოდებს გავრცელებულ ხმებს ბოკერია-ივანიშვილის გარიგების შესახებ.
“გამოვრიცხავ, რომ ბატონი ბიძინა რაიმე კულუარულ გარიგებაში იმყოფებოდეს „ნაციონალური მოძრაობის“ რომელიმე ფრთასთან”, – ამბობს კობახიძე.
“პრაიმტაიმი”