მსჯავრდებული ექსპრეზიდენტის, მიხეილ სააკაშვილის დედა გიული ალასანია ამბობს, რომ პოლონელი მედიკოსების ჩამოსვლის შესახებ პატიმრის ოჯახს ინიციატივა არ გამოუჩენია.
გიული ალასანია აცხადებს, რომ, სავარაუდოდ, ეს გადაწყვეტილება ევროკავშირის წევრი ქვეყნების ელჩების და საქართველოს იუსტიციის მინისტრის შეხვედრის დროს მიიღეს.
„არაფერი არ ვიცი, არავითარი კონტაქტი ვინმესთან ამ თემაზე არ მაქვს. 27 ქვეყნის ელჩები რომ შეხვდნენ იუსტიციის მინისტრს, როგორც ჩანს, ამის შედეგია. ჩვენ არ გამოგვიჩენია ინიციატივა და ამას არც აქვს არსებითი მნიშვნელობა – კარგია, რომ ჩამოდიან“, – აცხადებს გიული ალასანია.
იუსტიციის სამინისტროში განმარტეს, რომ საფუძველს მოკლებულია განცხადება, თითქოს მსჯავრდებულ მიხეილ სააკაშვილთან პოლონელი მედიკოსების დაშვება ევროკავშირის წევრი ქვეყნების ელჩების იუსტიციის მინისტრთან შეხვედრის შედეგად გადაწყდა. უწყების ცნობით, იუსტიციის მინისტრმა ჯერ კიდევ 29 ნოემბერს შესთავაზა პატიმარ სააკაშვილს ნებისმიერი უცხოური კლინიკიდან ნებისმიერი ექიმის ჩამოყვანა.