მოვუწოდებ საქართველოს ხელისუფლებას, მოითხოვოს მოსაზრება ევროპის საბჭოს ვენეციის კომისიისგან და დაიცვას მისი რეკომენდაციები, – განაცხადა ევროპის საბჭოს გენერალურმა მდივანმა, მარია პეიჩინოვიჩ-ბურიჩმა.
„აუცილებელია, რომ ნებისმიერი ასეთი კანონმდებლობა შეესაბამებოდეს ევროპის საბჭოს სტანდარტებს ადამიანის უფლებების, დემოკრატიისა და კანონის უზენაესობის კუთხით. ამ მიზნით, თუ ამ კანონის განხილვა გაგრძელდება, მოვუწოდებ საქართველოს ხელისუფლებას, მოითხოვოს მოსაზრება ევროპის საბჭოს ვენეციის კომისიისგან და დაიცვას მისი რეკომენდაციები“, – აღნიშნა მარია პეიჩინოვიჩ-ბურიჩმა.
„დინამიური და ენერგიული სამოქალაქო საზოგადოება მნიშვნელოვანია ნებისმიერი დემოკრატიის კარგი ფუნქციონირებისთვის. მოვუწოდებ საქართველოს ხელისუფლებას, უზრუნველყოს მნიშვნელოვანი და მშვიდობიანი პოლიტიკური დიალოგი, სამოქალაქო საზოგადოების მონაწილეობით“, – განაცხადა მან.
ვენეციის კომისიაში განაცხადეს, რომ 2023 წლის 8 მარტს საქართველოს პარლამენტის თავმჯდომარემ ვენეციის კომისიას სთხოვა განეხილა კანონპროექტები „უცხოური გავლენის გამჭვირვალობის“ შესახებ და „უცხოური აგენტების რეგისტრაციის“ შესახებ.
საქართველოს პარლამენტის თავმჯდომარემ, შალვა პაპუაშვილმა ევროპის საბჭოს ვენეციის კომისიის პრეზიდენტს, კლერ ბაზი მალორის წერილი გაუგზავნა, რომელშიც საქართველოს პარლამენტში წარდგენილ ორ კანონპროექტზე, „უცხოური გავლენის გამჭვირვალობის“ შესახებ და „უცხოური აგენტების რეგისტრაციის“ შესახებ კანონპროექტებზე დასკვნის მომზადებას სთხოვს.