როდესაც ვამბობთ უკანონო და დანაშაულებრივ ქმედებებს გადარჩენილ აქტივებს, ეს შეფასების საკითხი არ არის, ეს არის მოცემულობა – არსებობს შვეიცარიის სასამართლოს კანონიერ ძალაში შესული განაჩენი, რომლის მიხედვითაც დადგენილია, რომ დანაშაულებრივი ქმედებებით ზიანი მიადგა ბიძინა ივანიშვილს, მის ოჯახის წევრებსა და მათ კომპანიებს – ამის შესახებ ბიძინა ივანიშვილის ადვოკატმა ლაშა კალანდაძემ Credit Suisse-ზე საუბრისას გადაცემაში „იმედი LIVE“ განაცხადა.
მისივე განმარტებით, ეს გადარჩენილი აქტივები Credit Suisse-დან გადატანილია სხვა შვეიცარიულ ბანკში, თუმცა აქტივების მართვა დარჩა Credit Suisse-ს მიერ დაარსებულ, შვილობილ კომპანიას.
„ეს შვილობილი კომპანია მეტნაკლებად წარმატებით ართმევდა თავს, თუმცა 2022 წლის მარტიდან უკვე გარკვეული შეფერხებები გაჩნდა და მათი მხრიდან სხვადასხვა მიზეზმა იჩინა თავი. როდესაც ვთხოვეთ განმარტება, თუ რა იყო მიზეზი, პასუხად მივიღეთ აღმოსავლეთ ევროპაში მიმდინარე მოვლენები. შემდეგ უკვე სხვა მიზეზი გვითხრეს, ეს იყო ევროპარლამენტის რეზოლუცია. რაღაც ეტაპზე ისეთი მიზეზიც გვითხრეს, რომ ქველმოქმედებაში დიდი თანხა იხარჯება და ამან შეიძლება მის შთამომავლებს გარკვეული საფრთხეები შეუქმნას“, – განაცხადა ადვოკატმა.