საკანონმდებლო ინიციატივა შემოიტანეს ხატია დეკანოიძემ და რომან გოცირიძემ. რანაირი ლოგიკაა: ევრორეკომენდაციის შესრულებას, რასაც ისინი ებრძვიან, სხვა ადამიანებმა დაუჭირეს მხარი და ამბობენ, რომ „ოცნება“ აჯილდოებს იმ ადამიანებს ამ ინიციატივით, რომელიც დეკანოიძემ და გოცირიძემ შემოიტანეს. მაშინ უნდა დააბრალონ ხატია დეკანოიძეს და რომან გოცირიძეს, რომ ისინი ჩართულები იყვნენ ამ „შეთქმულების თეორიაში“, – ამის შესახებ ჟურნალისტებს „ქართული ოცნების“ აღმასრულებელმა მდივანმა, მამუკა მდინარაძემ განუცხადა კითხვაზე, „ნაცმოძრაობიდან“ წასულ ოპოზიციონერ დეპუტატებს მიეცემათ თუ არა პოლიტიკური ჯგუფის შექმნის შესაძლებლობა.
„წარმოუდგენელია, მაგრამ საუკუნის აფიორა დაალაგეს და ამერიკულ კანონზე ნახევარ ქვეყანას აძახებინეს, რომ ეს რუსული კანონია, ალბათ გათამამდნენ ამ პიარკამპანიის გარკვეული წარმატებით და სადაც ამერიკული რუსული გახდა, იქ დეკანოიძის და გოცირიძის შემოტანილი ინიციატივა შეიძლება იყოს სხვების სასარგებლო. ასე ფიქრობენ, მაგრამ მარტივად იშიფრება ასეთი ამბები და იმისთვის ვართ ჩვენ, რომ ეს ყველაფერი ვამხილოთ. თუ იქნება მხარდაჭერა, ეს გადაწყდება მხოლოდ უმრავლესობის სხდომაზე“, – აცხადებს მდინარაძე.