ირანის პრეზიდენტმა, მასუდ ფეზეშქიანმა და რუსეთის საგარეო საქმეთა მინისტრმა, სერგეი ლავროვმა თეირანში შეხვედრა გამართეს.
ორმხრივი ურთიერთობები და რეგიონული და საერთაშორისო მოვლენები განიხილეს. ასევე ისაუბრეს თეირანსა და მოსკოვს შორის თანამშრომლობის გაღრმავების საკითხებზე.
ამასთან, ლავროვმა შეხვედრა გამართა ირანის საგარეო საქმეთა მინისტრთან, აბას არაღჩისთან. მოლაპარაკებების შემდეგ ირანის საგარეო საქმეთა მინისტრმა განაცხადა, რომ თეირანსა და მოსკოვს შორის თანამშრომლობა ახლა უფრო მჭიდროა, ვიდრე ოდესმე.
„ჩვენ ყველა საკითხი განვიხილეთ – ევროპიდან დასავლეთ აზიამდე, მათ შორის ლიბანი, პალესტინა, უკრაინა და იემენი. ყურადღება გავამახვილეთ ეკონომიკური და ბირთვული თანამშრომლობის გაფართოებაზეც. ირანსა და რუსეთს შორის ჩვენს ისტორიაში არასდროს ყოფილა ისეთი მჭიდრო თანამშრომლობა, როგორიც ახლაა“, – დაწერა არაღჩიმ სოციალურ ქსელში.
სერგეი ლავროვი თეირანში სამუშაო ვიზიტით 19 ოქტომბერს ჩავიდა. ვიზიტის ფარგლებში რუსეთის საგარეო საქმეთა მინისტრი ირანის პრეზიდენტს, მასუდ ფეზეშქიანს შეხვდა, მოლაპარაკებები გამართა აბას არაღჩისთან და შეხვედრა გამართა ირანის ეროვნული უსაფრთხოების უმაღლესი საბჭოს მდივანთან, მოჰსენ რეზაისთან.