პარლამენტის საპროცედურო საკითხთა კომიტეტის თავმჯდომარის, ირაკლი ქადაგიშვილის განცხადებით, პოლიცია გარანტიას აძლევს არა რომელიმე ელჩს, არამედ ზოგადად კანონის მიხედვით გარანტიას აძლევს საქართველოს მოქალაქეებს. ასე უპასუხა მან აშშ-ის ელჩს კელი დეგნანს, რომელმაც „პრაიდის კვირეულის“ ღონისძიების ჩაშლის გამო პოლიცია გააკრიტიკა.
„პოლიცია იყო მობილიზებული და მოქმედებდა კანონის შესაბამისად, იცავდა წესრიგს და აქციის მონაწილეებს. მოვიდა ძალიან ბევრი ხალხი და გარემო იყო ღია, ყველა მხრიდან შეიძლებოდა მიდგომა, ამან განაპირობა ის, რომ სრულად ვერ მოხდა ტერიტორიის დაცვა. ამის გამო საყვედურის ფორმით საუბარი არ მიმაჩნია სწორად. მეორე მხრივ, პოლიციამ სწორად დაალაგა პრიორიტეტი, რომ „პრაიდის“ მონაწილეები გაიყვანა ტერიტორიიდან, რათა მათ ჯანმრთელობას და უსაფრთხოებას არანაირი საფრთხე არ დამუქრებოდა. ასე რომ, პოლიცია გარანტიას აძლევს არა რომელიმე ელჩს, არამედ ზოგადად კანონის მიხედვით გარანტიას აძლევს საქართველოს მოქალაქეებს. როდესაც სიტუაცია არის ექსტრემალური, პოლიცია ყოველთვის ირჩევს იმ პრიორიტეტს, რომელიც მნიშვნელოვანია იმ მომენტში. აქედან გამომდინარე, საქართველოს პოლიციას საყვედურები არ ეკუთვნის“, – აცხადებს ქადაგიშვილი.
„პრაიდ-ფესტივალთან“ დაკავშირებით ამერიკის ელჩი სამართალდამცველთა ქმედებებს აკრიტიკებს. კელი დეგნანი შსს-ს მიერ გაცემულ დაპირებას იხსენებს და აღნიშნავს, რომ ვანდალიზმის, ძარცვისა და ქონების განადგურების ფაქტებთან დაკავშირებით პოლიციას შესაბამისი პასუხი არ ჰქონია. ამერიკელი დიპლომატი შეშფოთებას გამოთქვამს თბილისის ქუჩებში განვითარებული მოვლენების გამო და ამბობს, რომ მოქალაქეებზე თავდასხმა კოოორდინირებული სერია იყო.