კახა კალაძე: ვფიქრობთ, რომ კულტურული მემკვიდრეობის დამცავ ზონებში სამშენებლო სამართალდარღვევებზე სანქციები გამკაცრდეს

თბილისის მერმა კახა კალაძემ დედაქალაქის მთავრობის სხდომაზე უკანონო მშენებლობებთან დაკავშირებით, ჯარიმების ზრდაზე ისაუბრა.

„მინდა, შევეხო ძალიან მნიშვნელოვან საკითხს, რომელიც უკავშირდება უნებართვო ან სანებართვო პირობების დარღვევით ნაწარმოებ მშენებლობებს. ჩვენთვის ეს საკითხი ძალიან მნიშვნელოვანია, რადგან თითოეული ასეთი შემთხვევა არღვევს და აზიანებს თბილისს, მის იერსახეს და ისტორიას. უკანონო მშენებლობები განსაკუთრებით ზიანის მომტანია კულტურული მემკვიდრეობის დამცავ ზონაში, რადგან ტერიტორია თავისი შინაარსით, ისტორიული და კულტურული სტატუსით, დედაქალაქისთვის განსაკუთრებულ ადგილს წარმოადგენს.

სწორედ ამიტომ, ხელისუფლებაში მოსვლისთანავე, დავიწყეთ ამ პრობლემის იდენტიფიცირება და პრევენციული ღონისძიებების გატარებაზე ზრუნვა. 2018 წელსვე მივმართეთ პარლამენტს კანონპროექტით და, დაახლოებით 3-4-ჯერ, ხოლო რიგ შემთხვევებში, 10-ჯერაც კი გავზარდეთ სანქციები. უფრო მეტიც, მოგვიანებით კვლავ მივმართეთ პარლამენტს კანონპროექტით და მშენებლობის შეჩერების შესახებ დადგენილების განმეორებით შეუსრულებლობა სისხლის სამართლის დანაშაული გახდა.

მიუხედავად ამისა, დაწესებული სანქციები, რიგ შემთხვევებში, მაინც ვერ აღმოჩნდა შემაკავებელი ბერკეტი ზოგიერთი მშენებელი კომპანიისთვის და მსგავსი ტიპის სამართალდარღვევებს, სამწუხაროდ, კვლავ ვაწყდებით. აღნიშნულიდან გამომდინარე, ვფიქრობთ რომ კულტურული მემკვიდრეობის დამცავ ზონებში სამშენებლო სამართალდარღვევებზე სანქციები გამკაცრდეს. ამიტომ, მოვამზადეთ კანონპროექტი, რომელიც ითვალისწინებს კულტურული მემკვიდრეობის დამცავ ზონებში უნებართვო ან სანებართვო პირობების დარღვევით ნაწარმოები მშენებლობისთვის ჯარიმების გაზრდას – I და II კლასის შემთხვევაში, დაახლოებით, 3-ჯერ, ხოლო IV და V კლასის შემთხვევაში, 5-ჯერ.

კერძოდ, კანონპროექტის მიხედვით:

ა) კულტურული მემკვიდრეობის დამცავ ზონაში უნებართვო მშენებლობა კერძო საკუთრებაში არსებულ უძრავ ქონებაზე – I და II კლასის მშენებლობის შემთხვევაში, 8 000 ლარის ნაცვლად, გამოიწვევს ჯარიმას 24 000 ლარის ოდენობით;

III და IV კლასის შენობა-ნაგებობის მშენებლობისთვის ან III და IV კლასის შენობა-ნაგებობაზე განხორციელებული მშენებლობისთვის ჯარიმა 20 000 ლარის ნაცვლად, იქნება 100 000 ლარი.

ბ) კულტურული მემკვიდრეობის დამცავ ზონაში უნებართვო მშენებლობა სახელმწიფოს ან მუნიციპალიტეტის საკუთრებაში არსებულ უძრავ ქონებაზე​- I კლასის მშენებლობისთვის გამოიწვევს ჯარიმას 24 000 ლარის ოდენობით, ნაცვლად, აქამდე არსებული 8 000 ლარისა;

სხვა კლასის შენობა-ნაგებობის მშენებლობისთვის კი, ჯარიმა 25 000 ლარის ნაცვლად, გახდება 125 000 ლარი.

გ) კულტურული მემკვიდრეობის დამცავ ზონაში სანებართვო პირობების დარღვევით ნაწარმოები შენობა-ნაგებობის მშენებლობისთვის – I კლასის შემთხვევაში, სამართალდამრღვევი პირები 2 000 ლარის ნაცვლად, 6 000 ლარით დაჯარიმდებიან;

II კლასის შემთხვევაში, ჯარიმა 4 000 ლარის ნაცვლად, იქნება 12 000 ლარი;

III კლასის შემთხვევაში, 10 000 ლარის ნაცვლად, ჯარიმას 50 000 ლარის ოდენობით გამოიწვევს;

IV კლასის შემთხვევაში, ჯარიმა 15 000 ლარის ნაცვლად, იქნება 75 000 ლარი.

აღნიშნულ კანონპროექტს განსახილველად, პარლამენტს გადავუგზავნით. იმედი გვაქვს, აღნიშნულ ინიციატივას საკანონმდებლო ორგანოს წარმომადგენლები მხარს დაუჭერენ. კიდევ ერთხელ აღვნიშნავ, რომ პროექტის მიზანი კულტურული მემკვიდრეობის დამცავ ზონებში უკანონო მშენებლობების მაქსიმალურად აღკვეთა და პრევენციული მექანიზმის შემოღებაა“, – განაცხადა თბილისის მერმა.