წალენჯიხაში, სადაც ტერენტობის დღესასწაულს აღნიშნავენ, ცისარტყელას ფერებში გამოფენილ ქოლგებს პროტესტი მოყვა. ქალაქის ცენტრში, „ალტ-ინფოს“ ადგილობრივი ორგანიზაციის წევრები შეიკრიბნენ და ქუჩებში ჩამოკიდებული ქოლგების ფერები გააპროტესტეს.
სადღესასწაულოდ მორთული ქალაქის ცენტრალური ქუჩები დროშებით და ფერადი ქოლგებითაა მოწყობილი, მათ შორის ორი ქოლგა ცისარტყელის ფერებშია, სწორედ ეს გახდა „ალტ-ინფოს“ წევრების პროტესტის მიზეზი. მათ განაცხადეს, რომ ეს ფერები არის ლგბტ ფერები, რაც გარყვნილების სიმბოლოა.
მოძრაობის წევრებმა წალენჯიხის მერიას რამდენიმე საათი მისცეს, რომ ჩამოეხსნათ ქოლგები, წინააღმდეგ შემთხვევაში, განაცხადეს, რომ მიმართავდნენ პროტესტის უფრო მწვავე ფორმას. პროტესტი რამდენიმე წუთს გაგრძელდა და ცისარტყელას ფერებით ორი ქოლგა ჩამოსხნეს, რის შემდეგაც „ალტინფოელები“ დაიშალნენ.
მერიაში აცხადებენ, რომ მათთვის გაურკვეველია, რატომ გამოიწვია ფერადმა ქოლგებმა, რომელიც მხოლოდ და მხოლოდ დღევადნელი დღესასწაულის ნაწილია, გარკვეული ჯგუფის გაღიზიანება. მათივე თქმით, ქოლგები თვითნებურად ჩამოხსნეს და მერიას არ გაუცია ბრძანება.
