სამშვიდობო მოლაპარაკებებზე ყველა უნდა დავრწმუნდეთ, რომ რუსეთი დატოვებს ყველა ოკუპირებულ ტერიტორიას და აღიარებს, სად არის მისი საზღვრები, ეს არის მეზობლებთან ურთიერთპატივისცემის დასაწყისი, – ამის შესახებ საქართველოს პრეზიდენტმა, სალომე ზურაბიშვილმა პარიზის მშვიდობის ფორუმზე სიტყვით გამოსვლისას განაცხადა.
როგორც სალომე ზურაბიშვილმა აღნიშნა, რუსეთსა და ევროკავშირს შორის არჩევანი გაკეთებულია, რაც საქართველო არსებობს, ეს გაკეთდა ნათლად დამოუკიდებლობის მოპოვებიდან 1991 წელსვე და ეს იყო მუდმივი არჩევანი.
„ორი დღის წინ ევროკომისიამ ბოლოს და ბოლოს გასცა დადებითი რეკომენდაცია საქართველოს კანდიდატის სტატუსთან დაკავშირებით. ერთი დღით ადრე კი რუსეთმა, როგორც სჩვევია, ჩვენი ოკუპირებული ტერიტორიების დელიმიტაციის ხაზზე მოკლა ერთი ჩვენი მოქალაქე, მეორე კი მძევლად აიყვანეს და ეს არის ის რაც ხდება მუდმივად. ისინი იღებენ აფხაზეთის აეროპორტს და შავ ზღვაზე მდებარე ერთ-ერთი პორტის სამხედრო ბაზად გარდაქმნის პროცესში არიან, შავ ზღვაზე ფლოტის შესაქმნელად. ასე რომ, ეს არის რუსეთი.
ჩვენი იმედები უკავშირდება ევროკავშირს. იმას რომ ჩვენ გავხდეთ სრულფასოვანი წევრები დრო დასჭირდება, მაგრამ პროცესი მიმდინარეობს და ევროკავშირი გარედან ჩანს, როგორც ადგილი, სადაც საბოლოოდ უსაფრთხოდ ვგრძნობთ თავს. დარწმუნებული ვარ, რომ ჩვენის პარტნიორებისთვის აღმოსავლეთ ევროპიდან რომლებიც რამდენიმე წლის წინ შეუერთდნენ ს ევროკავშირ და ასევე უკრაინა და მოლდოვისთვის ევროკავშირი არის წითელი ხაზი, რომელსაც რუსეთი ვერ გადაკვეთს. ის, რომ რუსეთი არ იცვლება, ეს ჩვენი ცხოვრების ფაქტია.
ის დარჩა იმპერიალისტურ ძალად, შესაძლოა, ნაწილობრივ იმიტომ, რომ ევროპული და ზოგადად დასავლური ძალები ძალიან დიდი ხნის განმავლობაში, სხვაგვარად აღიქვამდნენ რუსეთს. მაგრამ ახლა, როდესაც მათ აღმოაჩინეს რუსეთის რეალობა, ჩვენ უნდა ვიცოდეთ, რომ ეს არის რეალობა, რომელიც არ შეიცვლება არასდროს, სანამ რუსეთი არ აღიარებს, რომ მას, როგორც მსოფლიოს ნებისმიერ სხვა ერს აქვს საზღვრები, რომლებსაც პატივი უნდა სცეს.
თუ თქვენ ნებისმიერ რუსს სთხოვთ, დახაზონთავიანთი ქვეყნის რუკა, ზოგი მოიცავს უკრაინასაც, საქართველოსაც. მათ არ იციან და ეს ჩვენი, ევროკავშირის მოვალეობაა, გავაგებინოთ. მათ ხვალ უნდათ ევროპის კონტინენტზე არქიტექტურის ზოგიერთი ფორმის რეკონსტრუქცია. დავრწმუნდეთ, რომ რუსეთი საბოლოოდ გაიგებს ამას და ვფიქრობ, ეს იქნება მთავარი მიზანი, როცა სამშვიდობო მოლაპარაკებების დრო მოვა, როცა უკრაინა ჩათვლის, რომ მიაღწია მიზნებს, დაიცვას თავისი ტერიტორიის სუვერენიტეტი და მთლიანობა. სამშვიდობო მოლაპარაკებებზე ყველა უნდა დავრწმუნდეთ, რომ რუსეთი დატოვებს ყველა ოკუპირებულ ტერიტორიას და აღიარებს, სად არის მისი საზღვრები, ეს არის მეზობლებთან ურთიერთპატივისცემის დასაწყისი. ეს არის თანამშრომლობის დასაწყისი. ეს არის აბსოლუტური აუცილებლობა. ევროკავშირს თუ სურს, ხვალ ჰქონდეს შავი ზღვა, რომელიც გახდა ევროპული თანამშრომლობისა და კავშირის ზღვა, ეს არ იქნება, თუ ჩვენ არ გადავიყვანთ რუსეთს ნორმალურ ფორმებში“, – განაცხადა სალომე ზურაბიშვილმა.