პრიორიტეტი იქნება ის, რომ გამოვლენილი დამნაშავე პირები პასუხისგებაში მიეცნენ და განხორციელდეს შესაბამისი დევნა. ეს არის სახელმწიფოს გეგმა და მგონი, ეს ყველაფერი ლოგიკაში ჯდება, – ამის შესახებ შიდა ქართლის სახელმწიფო რწმუნებულმა, მიხეილ შაყულაშვილმა ჟურნალისტებს, საოკუპაციო ძალების მიერ თამაზ გინტურის მკვლელობაზე საუბრისას განუცხადა.
შაყულაშვილი სოფელ კირბალში რუსების მიერ მოკლულის სამოქალაქო პანაშვიდზე იმყოფებოდა.
„ვუსამძიმრებ ოჯახს. ზოგადად, ამ საქმესთან დაკავშირებით მინდა ასეთი რაღაც ვთქვა, აქამდე ვთქვი, რომ სახელმწიფოს ნომერ პირველი პრიორიტეტი იყო გატაცებული ადამიანის გამოყვანა, ახლა, უკვე პრიორიტეტი შეიცვალა და პრიორიტეტებს შორის ნომერ პირველ ადგილზე არის ის, რომ ჩატარდეს სრულყოფილი გამოძიება. ამის შემდეგ პრიორიტეტი იქნება ის, რომ გამოვლენილი დამნაშავე პირები პასუხისგებაში მიეცნენ და განხორციელდეს შესაბამისი დევნა. ეს არის სახელმწიფოს გეგმა და მე მგონი, ეს ყველაფერი ყველა ლოგიკაში ჯდება“, – განაცხადა შაყულაშვილმა.
თამაზ გინტური 6 ნოემბერს, სოფელ კირბალთან, რუსეთის მიერ ოკუპირებულ ტერიტორიაზე, საოკუპაციო ძალის წარმომადგენელმა, უკანონოდ დაკავების მცდელობისას, ცეცხლსასროლი იარაღით მოკლა. მასთან ერთად მყოფი, მისი თანასოფლელი, ლევან დოთიაშვილი, რუსეთის საოკუპაციო ძალებმა უკანონოდ დააკავეს, თუმცა გუშინ ქართულ მხარეს გადმოსცეს.