პრეზიდენტს ძალიან კარგად უნდა სცოდნოდა, რომ სულ რაღაც ერთი თვის წინ საქართველოს სტრატეგიული თანამშრომლობის შეთანხმება გააფორმა ჩინეთის სახალხო რესპუბლიკასთან და ამგვარი განცხადების გაჟღერება საერთაშორისო მედიის საშუალებით, რბილად რომ ვთქვათ, ძალიან დიდ უხერხულობას შექმნიდა ქართულ-ჩინურ ურთიერთობებში და უხერხულ მდგომარეობაში ჩააყენებდა საქართველოს მთავრობას, მის ხელმძღვანელს, ბატონ ღარიბაშვილს, – ამის შესახებ ფრაქცია „ქართული ოცნების“ თავმჯდომარის მოადგილემ, გია ცაგარეიშვილმა განაცხადა.
მისი თქმით, სი ძინ პინთან დაკავშირებით სალომე ზურაბიშვილის განცხადებას არავითარი გამართლება არ აქვს.
„პრეზიდენტს ძალიან კარგად უნდა სცოდნოდა, რომ სულ რაღაც ერთი თვის წინ საქართველომ სტრატეგიული თანამშრომლობის შეთანხმება გააფორმა ჩინეთის სახალხო რესპუბლიკასთან და ამგვარი განცხადების გაჟღერება საერთაშორისო მედიის საშუალებით, რბილად რომ ვთქვათ, ძალიან დიდ უხერხულობას შექმნიდა ქართულ-ჩინურ ურთიერთობებში და უხერხულ მდგომარეობაში ჩააყენებდა საქართველოს მთავრობას, მის ხელმძღვანელს, ბატონ ღარიბაშვილს. ამაზე ან ვერ იფიქრა სალომე ზურაბიშვილმა და ეს ერთი უბედურებაა, ან იფიქრა და შეგნებულად გააკეთა ეს განცხადება და ეს მეორე უბედურებაა. არც ერთ და არც მეორე შემთხვევაში ამას არავითარი გამართლება არ აქვს. როდესაც ასეთი კარიერული გზა გაქვს გავლილი და შენი კარიერის დასასრულს ასეთ მკვახე განცხადებას აკეთებ სტრატეგიულ პარტნიორზე, ე.ი. რეალობას ხარ საერთოდ მოწყვეტილი“, – აღნიშნა გია ცაგარეიშვილმა.
საქართველოს პრეზიდენტს, სალომე ზურაბიშვილს LCI-სთან ინტერვიუს დროს ჰკითხეს, იმედოვნებს თუ არა, რომ პუტინი და სი ძინ პინი როდესმე გასამართლდებიან, რაზეც ზურაბიშვილმა უპასუხა: „მე ჩემი შინაგანი რწმენით ვფიქრობ, რომ ეს იქნებოდა ისტორიული შედეგი, რაც გარკვეულ საკითხებს თავის ადგილს მიუჩენდა“.