პარლამენტი და საქართველოს ეროვნული პლატფორმა – აღმოსავლეთ პარტნიორობის სამოქალაქო საზოგადოების ფორუმი მესამე ერთობლივ კონფერენციას „საქართველოს გზა ევროკავშირისკენ“ გამართავენ.
კონფერენციას გახსნიან საქართველოს პარლამენტის თავმჯდომარე შალვა პაპუაშვილი, ევროკავშირის ელჩი პაველ ჰერჩინსკი და საქართველოს ეროვნული პლატფორმის თავმჯდომარე ნინო ჩხობაძე.
კონფერენციის მონაწილეები იმსჯელებენ ევროკომისიის მიერ საქართველოსთვის კანდიდატის სტატუსის მინიჭებასთან დაკავშირებით დადებით რეკომენდაციაზე და განიხილავენ ცხრა პრიორიტეტს.
კონფერენციაზე განსახილველი ძირითადი საკითხებია: სასამართლო სისტემის რეფორმა, საარჩევნო პროცესი და დეპოლარიზაცია, დეოლიგარქიზაცია, მედია და დეზინფორმაციასთან ბრძოლა, საქართველოს შესაბამისობა ევროკავშირის საერთო საგარეო და უსაფრთხოების პოლიტიკასთან. კონფერენციაში მონაწილეობას მიიღებენ საპარლამენტო უმრავლესობის ლიდერი ირაკლი კობახიძე, დეპუტატები და არასამთავრობო ორგანიზაციების წარმომადგენლები.