ევროპული საბჭოს პრეზიდენტმა, შარლ მიშელმა განაცხადა, რომ ყველაფერს გააკეთებს, რათა დეკემბერში ევროპულმა საბჭომ დაამტკიცოს უკრაინასთან ევროკავშირში გაწევრიანების შესახებ მოლაპარაკებების დაწყება.
“ჩემი მიზანია ყველაფერი გავაკეთო იმისთვის, რომ დადებითი გადაწყვეტილება მივიღოთ, მაგრამ იცით, რომ ევროპულ საბჭოში გადაწყვეტილების მიღება ერთსულოვნად ხდება, რაც ყოველთვის გამოწვევაა”, – აღნიშნა შარლ მიშელმა უკრაინულ გამოცემა Kyiv Independent-თან ინტერვიუში.
“ძალიან მნიშვნელოვანია ძალიან ძლიერი სიგნალის გაგზავნა. რატომ? რადგან ეს მორალური მოვალეობის საკითხია. უკრაინელები იბრძვიან ჩვენი საერთო დემოკრატიული ღირებულებებისა და პრინციპებისთვის. ასევე, იმიტომ, რომ გაფართოება ამ პირობებში, უფრო მეტად, ვიდრე ოდესმე, არის ინვესტიცია მშვიდობაში, უსაფრთხოებასა და კეთილდღეობაში”, – განაცხადა შარლ მიშელმა.
შარლ მიშელმა იმედი გამოთქვა, რომ ევროპული საბჭო და მისი წევრები აღიარებენ უკრაინის ხელისუფლების უზარმაზარ ძალისხმევას საჭირო რეფორმების განხორციელებაში.