„ეროვნულების“ ლიდერის სანდრო ბრეგაძის განცხადებით, პარლამენტის თავმჯდომარე დავით უსუფაშვილს „ქართული ოცნების“ ყრილობაზე მისვლა თავისმა მეუღლემ, თავდაცვის მინისტრმა თინა ხიდაშელმა აუკრძალა.
ამის შესახებ ბრეგაძემ გაზეთ „ალიასთან“ ინტერვიუში განაცხადა.
„ჩემი ინფორმაციით, უსუფაშვილი უნდა მისულიყო ყრილობაზე. დარწმუნებით გეტყვით, რომ „რესპუბლიკური პარტიიდან“ მხოლოდ უსუფაშვილი უნდა მისულიყო, თუმცა მას მეუღლემ, თავდაცვის მინისტრმა თინა ხიდაშელმა აუკრძალა მმართველი პარტიის ყრილობაზე მისვლა. ახლა ეს ანეკდოტი არ არის? პარტიამ, რომელსაც სამი მინისტრი ჰყავს მთავრობაში, ბოიკოტი გამოუცხადა მმართველ გუნდს ყრილობაზე. ეს არის მარაზმი. ყველაზე გასაოცარი და სარკაზმი კი ის არის, რომ დღემდე თანამდებობებს ინარჩუნებენ, ამას უკვე სახელი ვეღარ მოვუფიქრე, ასეთი მარაზმი არც ერთ ქვეყანაში არ ხდება. საერთოდ, ამ უთავმოყვარეო პარტიის პოზიციები ვერ გავიგე, თან ოპოზიციაში არიან, ამავდროულად მინისტრის პორტფელებს ებღაუჭებიან, ვერც იმ მთავრობის გავიგე, რომლებიც მათ თანამდებობაზე ტოვებენ. ეს იმდენად სერიოზული პოლიტიკური აჯაფსანდალია, რომლის ახსნაც უდიდეს პოლიტოლოგსაც კი გაუჭირდებოდა“ – განაცხადა ბრეგაძემ.