აშშ-ში ქალაქ ოკლაჰომას სამხარეო სასამართლომ გაამართლა კაცი, რომელმაც ციხეში 48 წელი გაატარა მკვლელობისთვის, რომელიც არ ჩაუდენია. ეს აშშ-ის ისტორიაში ამ დრომდე ცნობილი ყველაზე ხანგრძლივი უსაფუძვლო პატიმრობაა. ინფორმაციას უცხოური მედია ავრცელებს.
70 წლის გლინ სიმონსი ივლისში გაათავისუფლეს, როდესაც სამხარეო სასამართლომ დაადგინა, რომ მის საქმეში გადამწყვეტი მტკიცებულებები დაცვის მხარეს არ გადაეცა.
ამის შემდეგ, 18 დეკემბერს ოლქის სამხარეო პროკურორმა განაცხადა, რომ ახალი სასამართლოს გასამართად საკმარისი მტკიცებულებები არ არსებობდა. მომდევნო დღეს კი მოსამართლე ემი პალუმბომ სიმონსი უდანაშაულოდ გამოაცხადა.
„სასამართლო მკაფიო და დამაჯერებელი მტკიცებულების საფუძველზე მიიჩნევს, რომ დანაშაული, რომლის გამოც ბატონი სიმონსი გაასამართლეს, განაჩენი გამოუტანეს და დააპატიმრეს […] არ იყო ჩადენილი ბატონი სიმონსის მიერ”,- თქვა ოკლაჰომას ოლქის სამხარეო მოსამართლე პალუმბომ განაჩენის გამოცხადებისას.
განაჩენის გამოცხადების შემდეგ, ჟურნალისტებთან საუბრის დროს, გლინ სიმონსმა აღნიშნა, რომ ეს გადაწყვეტილება “გამძლეობისა და მიზანდასახულობის გაკვეთილია”.
„ეს გამძლეობისა და მიზანდასახულობის გაკვეთილია. არავის მისცეთ უფლება გითხრათ, რომ რაიმე ვერ მოხდება, რადგან ყველაფერი შესაძლებელია”,- უთხრა სიმონსმა AP-ს.
გლინ სიმონსმა 48 წელი, 1 თვე და 18 დღე ციხეში 1974 წელს ალკოჰოლური სასმელების მაღაზიის ძარცვის დროს მომხდარი მკვლელობის გამო გაატარა.
სიმონსი 22 წლის იყო, როდესაც 1975 წელს ის და თანაბრალდებული დონ რობერტსი გაასამართლეს და სიკვდილით დასჯა მიუსაჯეს.
მოგვიანებით სასჯელი აშშ-ის უზენაესი სასამართლოს მიერ სიკვდილით დასჯის შესახებ მიღებული გადაწყვეტილების შედეგად უვადო პატიმრობამდე შემცირდა.
გლინ სიმოსი პატიმრობის ბოლო დღემდე საკუთარ უდანაშაულობას ინარჩუნებდა და ამტკიცებდა, რომ მკვლელობის დროს იგი ლუიზიანას შტატში, საკუთარ სახლში იმყოფებოდა.
ივლისში სიმონსს სამხარეო სასამართლომ სასჯელი გააუქმა მას შემდეგ, რაც დადგინდა, რომ პროკურორებმა დაცვის მხარეს არ გადასცეს ყველა მტკიცებულება, მათ შორის, ის, რომ მოწმემ სხვა ეჭვმიტანილები ამოიცნო.
სიმონსი და რობერტსი ნაწილობრივ მოზარდის ჩვენების გამო გაასამართლეს, რომელსაც თავში ტყვია ჰქონდა მოხვედრილი. მოზარდი ამოცნობის დროს, რამდენიმე სხვა ეჭვმიტანილზე მიუთითებდა და მოგვიანებით თავდაპირველ ჩვენებას ეწინააღმდეგებოდა.
დონ რობერტსი 2008 წელს ვადაზე ადრე პირობითით გაათავისუფლეს.
აღსანიშნავია, რომ უკანონოდ გასამართლებულ პირებს, რომლებიც სასჯელს ოკლაჰომაში იხდიდნენ, კომპენსაციის სახით მაქსიმუმ 175 000 აშშ დოლარი მიღება შეუძლიათ.
48-წლიანი პატიმრობიდან გათავისუფლებული გლინ სიმონსი ამჟამად ღვიძლის კიბოს ებრძვის და ქიმიოთერაპიისა და საცხოვრებელი ხარჯების დასაფარად GoFundMe-ზე კამპანიას აწარმოებს.