მოხარული ვართ ევროკავშირის გადაწყვეტილებით, ეს შესანიშნავი ამბავია საქართველოსთვის და ასევე ნატო-სთვისაც, – ამის შესახებ ნატო-ს სპეციალურმა წარმომადგენელმა სამხრეთ კავკასიას და ცენტრალურ აზიაში, ხავიერ კოლომინამ „პირველ არხთან“ ექსკლუზიურ ინტერვიუში განაცხადა.
როგორც კოლომინა აცხადებს, ნატო-სა და საქართველოს ურთიერთობები დადებითად ვითარდება.
მან კიდევ ერთხელ გაამახვილა ყურადღება საქართველოსთან სამხედრო თანამშრომლობის მნიშვნელობაზე და მიესალმა საქართველოსთვის ევროკავშირის კანდიდატის სტატუსის მინიჭებას.
„ჩვენ ვმუშაობთ ძალიან ბევრ სფეროში, მათ შორის კიბერუსაფრთხოების სფეროში, ჰიბრიდულ საფრთხეებზე და საზღვაო უსაფრთხოების სფეროში, სპეციალური ოპერაციების ძალების კუთხით. ჩვენ შესანიშნავ სამუშაოს ვასრულებთ, რათა საქართველოს შეიარაღებული ძალები იყოს უფრო მეტად თავსებადი ნატო-ს ძალებთან რომ გაიზარდოს მათი პროფესიონალიზმი. ჩვენ გაწეული სამუშაოთი ძალზედ კმაყოფილი ვართ. შესაბამისად, საქართველოსთან ურთიერთობა ძალიან კარგ დონეზეა. ეს ასე იყო ბოლო წლებშიც. ამჟამად ჩვენ მოხარული ვართ ევროკავშირის მიერ მიღებული გადაწყვეტილებით, რომ საქართველოს მიენიჭა ევროკავშირის წევრობის კანდიდატის სტატუსი. ეს შესანიშნავი ამბავია საქართველოსთვის და ასევე საერთაშორისო საზოგადოებისთვისაც“, – განაცხადა კოლომინამ.
კოლომინამ ასევე ისაუბრა შავი ზღვის რეგიონის სტრატეგიულ მნიშვნელობაზე.
მისვე თქმით, მოსკოვის გეგმა რუსეთის მიერ ოკუპირებულ აფხაზეთში ახალი სამხედრო საზღვაო ბაზა მოაწყოს ნატო-ში შეშფოთებას იწვევს.
„ყოველთვის, როდესაც ვხედავთ რუსეთის მხრიდან მცდელობას გაზარდოს წარმომადგენლობა იმ სივრცეში, რომელიც ჩვენ უშუალო სიახლოვესაა, ეს იწვევს შეშფოთებას. შავი ზღვა დღეს უკვე განიხილება რეგიონული სტრატეგიული მნიშვნელობის მქონე სივრცედ და შესაბამისად, ის არის ნატო-ს სამხედრო გეგმების შემადგენელი ნაწილი. შესაბამისად, ჩვენ თუ დავინახავთ ამის საჭიროებას, ნატო-ს ექნება შესაძლებლობა და ნება, რომ ვიმოქმედოთ, თუ ჩვენ თავს დაგვესხმებიან ან დავინახავთ, რომ ჩვენ გვემუქრებიან“, – განაცხადა კოლომინამ.
მან ასევე თქვა, რომ ნატო ერთგულია ბუქარესტის სამიტის გადაწყვეტილების, რომ საქართველო გახდება ალიანსის წევრი.
ამასთან, ნატო-ს სპეციალურმა წარმომადგენელმა განაცხადა, რომ ნატო-ში ამ ეტაპზე რუსეთის მხრიდან საქართველოს წინააღმდეგ სამხედრო აგრესიის საფრთხეს ვერ ხედავენ.
„დღეს ჩვენ ვერ ვხედავთ ამის საფრთხეს. ჩვენ ვერ ვხედავთ საფრთხეს, რომ რუსეთი აპირებს საქართველოში შეჭრას. თუმცა ჩვენ გვჯერა, რომ არსებობს ჰიბრიდული თავდასხმების საფრთხე, კიბერსივრცეში ჩარევის და მავნებლური ჩარევის რიკები. სწორედ ამიტომ გადავწყვიტეთ მადრიდის სამიტზე დავამტკიცოთ ამ საჭიროებებზე მორგებული მხარდაჭერა, რომ დავეხმაროთ საქართველოს ამ ვითარებაში“, – განაცხადა კოლომინამ.
სამხრეთ კავკასიასა და ცენტრალურ აზიაში ნატო-ს გენერალური მდივნის სპეციალურ წარმომადგენელთან ინტერვიუს მოისმენთ 22 დეკემბერს, 14:00 საათზე „საქართველოს რადიოს“ ეთერში, ლევან ახალაიას საავტორო გადაცემაში „მსოფლიოს ამბები“, ინტერვიუს სრულ ვერსიას კი ნახავთ 24 დეკემბერს 21:00 საათზე, „პირველ არხზე“, გადაცემაში „კვირის მოამბე“.