“სირთულეები რომლებსაც უკრაინა ფრონტზე აწყდება, გამოწვეულია დასავლეთის მხრიდან შეიარაღების მიწოდების დაბალი ტემპებით”

სირთულეები, რომლებსაც უკრაინა ფრონტზე აწყდება, გამოწვეულია დასავლეთის მხრიდან შეიარაღების მიწოდების დაბალი ტემპებითა და არასაკმარისი მოცულობით – უკრაინული მედიის ცნობით, ამის შესახებ The Times-ს უკრაინის პრეზიდენტის ოფისის ხელმძღვანელის მრჩეველმა, მიხაილო პოდოლიაკმა განუცხადა.

„როდესაც შენ ერთ თვეში გარკვეული რაოდენობის შეიარაღება უნდა მიიღო, ეს შეიარაღება კი 8 თვეში ჩამოდის, ფაქტობრივად, ამ 8 თვის განმავლობაში შენ ვერაფერს აკეთებ“, – აღნიშნა პოდოლიაკმა.

მისივე თქმით, დასავლურმა ქვეყნებმა ჯერ კიდევ სრულად ვერ გაიაზრეს, თუ რა საფრთხეს უქმნის რუსეთი საერთაშორისო უსაფრთხოებას.

„თუ უკრაინისთვის შეიარაღების მიწოდებაზე შეთანხმება არ მოხდება, მთელი ქვეყანა თქვენს თვალწინ განადგურდება. შემდეგ თქვენ დაიწყებთ ტირილს და იტყვით – „როგორ გვეცოდებიან უკრაინელები, რომლებსაც საკუთარი სახელმწიფო აღარ აქვთ, მოდით, მათთვის კონცერტი გავმართოთ“, – აღნიშნა უკრაინის პრეზიდენტის ოფისის ხელმძღვანელის მრჩეველმა.