სერბეთის პრემიერმინისტრმა, ანა ბრნაბიჩმა განაცხადა, რომ ბელგრადში მოსალოდნელი არეულობის შესახებ სერბეთი რუსეთის უსაფრთხოების სამსახურმა გააფრთხილა.
ტელეკომპანია Pink-ის ეთერში ბრნაბიჩმა თქვა, რომ პირადად დაუკავშირდა დასავლეთის ქვეყნების დიპლომატებს, რათა ეცნობებინა მიღებული ინფორმაცია, მაგრამ მათ ცნობები სერიოზულად არ მიიღეს.
„ჩვენ გვქონდა მონაცემები სამსახურებიდან, რომლებიც გვაფრთხილებდნენ. პირველ ყოვლისა, ეს ინფორმაცია რუსეთის უშიშროების სამსახურმა მოგვაწოდა, მაგრამ დასავლეთის ქვეყნების წარმომადგენლებმა დაგვადანაშაულეს დეზინფორმაციის გავრცელებაში და რომ ეს ყველაფერი სისულელეა. იცინოდნენ და, როგორც პრეზიდენტმა ალექსანდრ ვუჩიჩმა თქვა, ზოგმა ეს სერიოზულად მიიღო, ზოგს დახმარება სურდა და ბევრმა იცოდა და არ უნდოდა დახმარება“, – თქვა ბრნაბიჩმა.
მანვე ხაზგასმით აღნიშნა, რომ სერბეთში ხალხი გადაწყვეტს – სად მიდის ქვეყანა.
მისივე თქმით, სერბეთში „ახალი მეიდანი“ არ იქნება.