საქართველოს წამყვანი ტურისტული კომპანიები და ორგანიზაციები ბალდის კანიონის პროექტ დადებითად აფასებენ. დარგის სპეციალისტები ხედავენ პროექტის მნიშვნელობას და იმ სარგებელს, რასაც რაიონსა და ქვეყანას ბალდის კანიონზე განვითარებული ტურისტული ინფრასტრუქტურა მოუტანს.
საქართველოს ტურისტული გილდიის აღმასრულებელი დირექტორი ნატალია ანდრონიკაშვილი დარწმუნებულია, რომ პროექტი გაამართლებს და ძალიან წარმატებული იქნება.
„ეს პროექტი ძალიან მაინტერესებდა, რადგან, მარტვილის კანიონის პარალელურად, ბალდის კანიონს წლებია, აქტიურად ვიყენებ. როდესაც შესაძლებელი იქნება, ტურისტს რეგიონალურად შესთავაზო აწყობილი კანიონური სისტემა, ეს უკვე არა კონკრეტული ობიექტი, არამედ ატრაქცია იქნება.
ჩვენი ტურიზმის დეპარტამენტი აქტიურად ეწევა საქართველოს რეკლამას გალფის ქვეყნებში. ეს ის კონტინენტია, რომელსაც აქცენტი აქვს იმაზე, რაც მისთვის უცხოა. ბუნების სილამაზე, სიმწვანე, ტბები, ჩანჩქერები, მდინარეები და კანიონები მათთვის საოცრად მოთხოვნადია. როცა ორი კანიონი ერთმანეთს დაუკავშირდება, ცხადია, რაიონი მეტ ტურისტს მიიღებს. პროექტის შიდა სამზარეულო საკმაოდ კარგად ვიცი და დარწმუნებული ვარ, რომ ძალიან წარმატებული იქნება. ეს პროექტი იმუშავებს, ეს პროექტი მოიტანს თანხას და მას საოცარი გავლენა ექნება ადგილობრივ მოსახლეობაზე,“ – აცხადებს ნატალია ანდრონიკაშვილი.
შეგახსენებთ, რომ ბალდის კანიონის პროექტს ტენდერში გამარჯვებული კომპანია „კანიონი 350“ ახორციელებს. კომპანიას ხეობის 2500-მეტრიანი მონაკვეთის ნაწილი – 500 მეტრის სიგრძის მონაკვეთი – 40-წლიანი იჯარით, კონკრეტული ეკოტურისტული ინფრასტრუქტურული პროექტის განსახორციელებლად გადაეცა.
დაცული ტერიტორიების სააგენტოსთან გაფორმებული ხელშეკრულებით, კომპანიამ აიღო ვალდებულება, მთის გაყოლებაზე მოაწყოს 400 მეტრის სიგრძის ვიწრო საფეხმავლო ბილიკი, ასევე 370 მეტრზე მოეწყობა როლერის ატრაქცია, რომლის მეშვეობითაც, დამთვალიერებელი კანიონის იმ ნაწილს გაივლის, რომელიც აქამდე მიუწვდომელი იყო. აქ იქნება პირველი როლერის ატრაქცია საქართველოში. ასევე, ეს იქნება საერთაშორისო სტანდარტებით განხორციელებული პირველი პროექტი საქართველოში, სადაც შშმ პირები სრულყოფილად შეძლებენ ადგილზე მოწყობილი ინფრასტრუქტურით სარგებლობას.
ნატალია ანდრონიკაშვილი: ბალდის კანიონის პროექტი იმუშავებს და მას საოცარი გავლენა ექნება
2023/12/28 17:25:46
კომენტარები
ნანახია: 80 ჯერ