“ისრაელმა უნდა მიიღოს ყველა ზომა, რათა თავიდან აიცილოს გენოციდური ქმედებები პალესტინელების წინააღმდეგ”

მართლმსაჯულების საერთაშორისო სასამართლომ გამოსცა მთელი რიგი დროებითი ზომები ისრაელის წინააღმდეგ იმის საფუძველზე, რომ პალესტინელების უფლებები უნდა იყოს დაცული მანამ, სანამ სასამართლო საბოლოო გადაწყვეტილებას არ გამოიტანს. ინფორმაციას ამის შესახებ ისრაელური მედია ავრცელებს.

სასამართლო აცხადებს, რომ ისრაელმა უნდა „მიიღოს ყველა ზომა მისი უფლებამოსილების ფარგლებში“, რათა თავიდან აიცილოს გენოციდური ქმედებები პალესტინელების წინააღმდეგ, როგორც ეს გათვალისწინებულია გენოციდის შესახებ კონვენციის მე-2 მუხლში.

სასამართლომ არ დააკმაყოფილა სამხრეთ აფრიკის მოთხოვნა ცალმხრივი ცეცხლის შეწყვეტის შესახებ ისრაელის სამხედრო ოპერაციაში “ჰამასის” წინააღმდეგ.

სასამართლო აცხადებს, რომ ისრაელმა თავიდან უნდა აიცილოს ღაზაში პალესტინელების მკვლელობა ან დაჭრა, უნდა აღკვეთოს პირობები, რომელიც გათვლილია ღაზის მოსახლეობის მთლიანად ან ნაწილობრივ განადგურებაზე.

სასამართლო ასევე ავალდებულებს ისრაელს, მიიღოს ზომები პალესტინელების წინააღმდეგ გენოციდის წაქეზების აღსაკვეთად და დასასჯელად და ღაზაში ცხოვრების არახელსაყრელი პირობების გადასაჭრელად.