„იმედის კვირა“ ილია ღუდუშაურს შეხვდა, რომელმაც განმარტა თუ როგორი იქნება რესპუბლიკური საავადმყოფოს ადგილას აშენებული ახალი სახელმწიფო კლინიკა. ჯანდაცვის მინისტრის თქმით, ახალ კლინიკაში სტრატეგიულად მნიშვნელოვანი პედიატრიული მიმართულება იქნება.
„ახალი საავადმყოფო იქნება იგივე ტერიტორიაზე, იქნება მინიმუმ 500-საწოლიანი, იქნება ყველა ის სტრატეგიული მიმართულება, რომელიც ქვეყანას სჭირდება. ასევე განთავსებული იქნება სისხლის ბანკი, რომელიც კანონმდებლობის შესაბამისად, სახელმწიფო უნდა იყოს. ყველაზე სტრატეგიული მიმართულება, რა თქმა უნდა პედიატრიული იქნება, რომელშიც ონკოჰემატოლოგიური მიმართულებაც იქნება გათვალისწინებული. ასევე სახელმწიფო ონკოცენტრი, სადაც პაციენტები მიიღებენ სრულ სერვისს, როგორც დიაგნოსტიკის, ასევე მკურნალობის ნაწილში – როგორც ქიმიოთერაპიის, ასევე ონკოქირურგიის სფეროში.
მან ასევე რესპუბლიკური საავადმყოფოს თანამშრომლების დასაქმებისა და კომპენსაციის საკითხზე ისაუბრა. ჯანდაცვის მინისტრის მოადგილე ამბობს, რომ კონსენსუსის მიღწევა შესაძლებელია, რადგან მათ ქვეყნის წინაშე უდიდესი წვლილი აქვთ, მათ შორის პანდემიის დროს, როდესაც დატვირთვა საკუთარ თავზე სწორედ მათ აიღეს.
„შეგვიძლია ვთქვათ, რომ სამინისტრო ნებისმიერი კომუნიკაციისთვის მზად არის და ნებისმიერ დროს შესაძლებელია, რომ პროექტის მიმდინარეობის ნებისმიერი მიმართულებით დამატებითი მიმართულება მივაწოდოთ. ეს ეხება როგორც კომპენსაციებს, ასევე ექსპერტიზის შედეგებს. იყო საუბრები, თითქოს ექსპერტიზის დასკვნა არავის გაუსაჯაროებია, მაშინ როდესაც ვებგვერდზეა გამოქვეყნებული ყველა ექსპერტიზის დასკვნა, რომელზეც ჩვენ ვსაუბრობთ. ამიტომ, ჩვენ მზად ვართ კომუნიკაციისთვის.
დაახლოებით 350-მდე ადამიანს უკვე ჩაბარდა შეთავაზება ოფიციალურად, რომელზეც 50-მდე თანამშრომელმა საკუთარი პოზიცია უკვე დააფიქსირა, ანუ აირჩია კომპენსაციის სქემა, რაც ჩვენ ოპტიმიზმის საფუძველს გვაძლევს. მესმის, რომ კონკრეტული ადამიანებისთვის პრობლემური და მტკივნეულია ეს საკითხი, მაგრამ მტკივნეული გადაწყვეტილებები პრობლემის სისტემური მოგვარებისთვის აუცილებელია“, – მიიჩნევს ღუდუშაური.