ჯანდაცვის მინისტრი უარყოფს ოპოზიციის მიერ გავრცელებულ ინფორმაციას, თითქოს გამჭვირვალობის კანონის მიღების შემდეგ ონკოპაციენტი ბავშვების საზღვარგარეთ მკურნალობას საფრთხე ემუქრება. მიხეილ სარჯველაძე განმარტავს, რომ მკურნალობა ქვეყნის ბიუჯეტიდან ფინანსდება და შესაბამისად, კანონს სახელმწიფო პროგრამასთან არანაირი კავშირი არ აქვს.
„არცერთი ონკოპაციენტი ბავშვის და არცერთი სხვა პროგრამის მიმართულებით, რომელიც სახელმწიფოს აქვს, არაფერს ემუქრება საფრთხე, არავითარი კანონის გამოისობით. რასაკვირველია, ყველასთვის გასაგებია, რომ ეს პროგრამები ურყევად, სტაბილურად გაგრძელდება და ამ კუთხით არავითარი რისკი არ არსებობს. თუკი რომელიმე სოციალური პროგრამის მიმართულებით ვინმეს რაიმე დაფინანსების შეწყვეტის სურვილი აქვს, როგორც ეს ბადრი ჯაფარიძემ გააკეთა, დაე, ეს გააკეთოს, ჯავრი იყაროს და დასაჯოს ეს ადამიანები, ვისთან მიმართებითაც სოციალური პასუხისმგებლობიდან გამომიდინარე მანამდე რაიმე სიკეთეს აკეთებდნენ. მაგრამ რა თქმა უნდა, ეს არ ნიშნავს იმას, რომ სახელმწიფო პროგრამით გათვალისწინებულ კონკრეტულ ღონისძიებებს რაიმე საფრთხე შეექმნას“, – აღნიშნა მინისტრმა.