სპორტულ შეჯიბრებაში 12 გუნდი მონაწილეობდა. I, II და III ადგილზე გასულ გუნდებს საჩუქრად თასები, მედლები და ფულადი ჯილდოები გადაეცათ.
დიდ ეკრანზე წამყვანმა გიორგი კალანდიამ ფეხბურთის ისტორიაში დაუვიწყარი ფაქტები და მოპოვებული წარმატებები აჩვენა.
მოწვეული იყვნენ ,,დინამოს“ ვეტერანი ფეხბურთელები, რომლებსაც ასევე სიმბოლური საჩუქრები – თასები და ფულადი ვაუჩერები გადაეცათ. კომპანია ,,ნიკორამ” კი ისინი მაღაზიათა ქსელის ვაუჩერებით დაასაჩუქრა. გაიმართა კონცერტიც. მაყურებლის წინაშე მომღერალი მაგდა ვასაძე და ჯგუფი ,,ჯემ სთეიშენი“ წარსდგა. ღონისძიების დასრულების შემდეგ ვეტერანთა კულტურისა და დასვენების პარკში ,,დინამოს“ ვეტერანი ფეხბურთელების სახელობის ზეთისხილის ხე დაირგო, რომელიც მათ სამშენებლო კომპანიამ ,,თბილისი ორიენტალი” გადასცა.
,,ფინალისტებს ვულოცავ მოპოვებულ გამარჯვებას, ყველა გუნდს კი ვუსურვებ წარმატებებს. ჩვენ მომავალშიც აქტიურად გავაგრძელებთ ახალგაზრდებში ჯანსაღი ცხოვრების წესის ხელშეწყობასა და პოპულარიზაციას, მათ განვითარებასა და წინსვლას როგორც სპორტულ, ასევე, ცხოვრების სხვა ასპარეზზე, სწორედ ამ მიზნით ნაძალადევის რაიონის გამგეობა განაგრძობს სპორტული მოედნების მშენებლობა-რეაბილიტაციას“- განაცხადა ნაძალადევის რაიონის გამგებელმა ირაკლი ანდღულაძემ.
ღონისძიება ნაძალადევის რაიონის გამგეობის დაფინანსებითა და კულტურის სამსახურის ორგანიზებით ჩატარდა, მას თბილისის მერის მოადგილე კახაბერ გულედანი, ნაძალადევის რაიონის გამგებელი ირაკლი ანდღულაძე და თბილისის საკრებულოს მაჟორიტარი დეპუტატი ირაკლი ხელაძე დაესწრნენ.
