ლიეტუვის მთავრობამ კიევში რუსეთის მიერ დაბომბილი ბავშვთა საავადმყოფოს აღსადგენად 1 მილიონი ევროს გამოყოფის გადაწყვეტილება მიიღო. ამის შესახებ ლიეტუვის პრემიერ-მინისტრმა ინგრიდა შიმონიტემ სოციალურ ქსელ X-ში დაწერა.
„ლიეტუვის მთავრობამ ახლახან 1 მილიონი ევრო გამოყო კიევში ბავშვთა საავადმყოფოს ოხმატდიტ-ის და სხვა სამედიცინო ობიექტების აღსადგენად, რომელიც რუსეთმა ასე გამიზნულად, ვერაგულად გაანადგურა. ტერორისტული სახელმწიფოს შეჩერების ერთადერთი გზა უკრაინის გამარჯვების მხარდაჭერის გაზრდაა. უკრაინის აღდგენის ერთადერთი სამართლიანი საშუალება აგრესორის მიერ საფასურის გადახდაა“, – აღნიშნავს შიმონიტე.
რუსეთმა კიევში მდებარე ბავშვთა საავადმყოფოზე იერიში 8 ივლისს მიიტანა. უკანასკნელი ინფორმაციით, თავდასხმას 37 ადამიანი ემსხვერპლა, რომელთაგან 3 ბავშვია. 170 ადამიანი კი დაშავდა.
