ეს არის სამწუხარო და კონტრპროდუქტიული იმ დროს, როდესაც ჩვენი გაცხადებული კურსია ევროკავშირში ინტეგრაცია, ასევე ნატო-ში ინტეგრაცია, ოღონდ ღირსეული ინტეგრაცია ერთგანაც და ღირსეული ინტეგრაცია მეორეგანაც-ასე ეხმაურება ფრაქცია „ქართული ოცნების“ თავმჯდომარის მოადგილე ირაკლი კირცხალია აშშ-ის და ევროკავშირის გადაწყვეტილებას თავდაცვის სფეროში თანხების გამოყოფის შეჩერების თაობაზე.
„დღის ქრონიკასთან“ საუბრისას ირაკლი კირცხალია ნატო-ს და ევროკავშირს საერთაშორისო მისიებში ქართველი ჯარის როლს ახსენებს და აცხადებს ამის დავიწყება უსამართლობაა.
„ეს არის სამწუხარო და კონტრპროდუქტიული იმ დროს, როდესაც ჩვენი გაცხადებული კურსია ევროკავშირში ინტეგრაცია, ასევე ნატო-ში ინტეგრაცია, ოღონდ ღირსეული ინტეგრაცია ერთგანაც და ღირსეული ინტეგრაცია მეორეგანაც. ეს განცხადება კონტრპროდუქტიულია, რადგან ჩვენ ვსაუბრობთ ურთიერთობის გადატვირთვაზე, განახლებაზე და ამ ყველაფერთან ერთად ინსტიტუციურ დონეზე აბსოლუტურად ყველაფერს აკეთებს ჩვენი ქვეყანა, რომ დაუახლოვდეს ევროკავშირს და ნატო-ს და ამას ჩვენ საქმით ვამტკიცებთ. სამწუხაროს შემდეგ, ასევე არის ძალიან რბილად, რომ ვთქვათ უსამართლო, უსამართლო ჩვენი ქვეყნის მიმართ პირველ რიგში, შემდეგ ჩვენი ჯარის მიმართ. ვნახეთ რა გადაწყვეტილებები მიიღეს, როგორი პოლიტიკური გადაწყვეტილებები კეთდება. აქ არ არის თანხებზე საუბარი, კონკრეტულად 30 მილიონ ევროზე თუ 27 მილიონ ევროზე, თანხები იმდენად მნიშვნელოვანი არ არის, რადგან თავდაცვის ბიუჯეტი საკმარო მაღალია ჩვენს ქვეყანაში, ჩვენი მდგომარეობიდან გამომდინარე“,-განაცხადა ირაკლი კირცხალიამ.
ირაკლი კირცხალიას განცხადებით, ეს ყველაფერი დაიწყო იმ ერთი ქართული ეროვნული კანონის მიღებით [გამჭვირვალობის შესახებ კანონი], რომელიც საქართველოს მეგობარ ქვეყნებში მოქმედებს თუმცა რატომღაც საქართველო ამ კანონის მიღების გამო კრიტიკის ობიექტი გახდა.