გერმანიის ერთ-ერთმა უმსხვილესმა აეროპორტმა „კიოლნი/ბონი“ ეკოაქტივისტების საპროტესტო აქციის გამო ფრენები დროებით შეაჩერა. ამის შესახებ BBC წერს.
გამოცემის ინფორმაციით, დაჯგუფება „უკანასკნელი თაობის“ წევრები უნებართვოდ აღმოჩნდნენ აეროპორტის ტერიტორიაზე და საკუთარი თავები ასაფრენი ბილიკის საფარზე მიაწებეს. დაჯგუფების ინფორმაციით, საუბარია 5 აქტივისტზე.
ადგილზე მობილიზებული იყო პოლიცია. ინციდენტის შედეგად რამდენიმე რეისი კიოლნის ნაცვლად გერმანიის სხვა ქალაქებში დაჯდა, 10-ზე მეტი ბორტის აფრენა კი გადაიდო ან გაუქმდა.
„უკანასკნელ თაობაში“ აცხადებენ, რომ მსგავსი „მშვიდობიანი, სამოქალაქო საპროტესტო აქციები“ დღეს ევროპისა და ჩრდილოეთ ამერიკის სხვადასხვა აეროპორტშიც განხორციელდება. დაჯგუფება გერმანიის მთავრობისგან 2030 წლისთვის ნავთობის, გაზისა და ნახშირის გამოყენებაზე უარის თქმას ითხოვს.