საქმეს, რომელიც ბიძინა ივანიშვილის მკვლელობის მომზადების საკითხს შეეხება, მმართველ გუნდში აფასებენ. განათლების, მეცნიერებისა და ახალგაზრდულ საქმეთა კომიტეტის თავმჯდომარის პირველი მოადგილე, „ქართული ოცნების” ახალგაზრდული ორგანიზაციის თავმჯდომარე გიორგი ჩაკვეტაძე აცხადებს, რომ თუკი ვინმეს ასეთი ჩანაფიქრი ჰქონდა, ეს აღიკვეთება.
„ერთი კვირის განმავლობაში ვუყურებდით იმას, რომ ფაქტობრივად, ეს ადამიანები როდესაც გამოკითხვიდან გამოდიოდნენ, არ ამბობდნენ რა მუხლზე იყვნენ, რა საქმესთან დაკავშირებით იყვნენ გამოკითხვაზე. შემდეგ აღიარეს, რომ ეს, მათ შორის, შეეხებოდა ტერორიზმის მუხლს და პარტიის საპატიო თავმჯდომარის შესაძლო ლიკვიდაციის საქმეს. რა თქმა უნდა, ჩვენთვის ეს მიუღებელია, წარმოუდგენელია, მაგრამ ამ ადამიანებისგან, რომლებსაც კოლექტიური „ნაცმოძრაობა“ ჰქვიათ, არაფერი გვიკვირს. სახელმწიფო უსაფრთხოების სამსახური ამ საქმეს ბოლომდე მიიყვანს და თუკი ვინმეს ჰქონდა ასეთი ჩანაფიქრი, რა თქმა უნდა, ეს აღიკვეთება“, – განაცხადა ჩაკვეტაძემ.
საქმე გრიფირებულია, რის გამოც კონკრეტული დეტალები არ საჯაროვდება, თუმცა, სუსმა ოფიციალურად დაადასტურა, რომ გამოძიება უკრაინაში მყოფი საქართველოს ყოფილი მაღალჩინოსნებისა და ძალოვანი უწყებების ყოფილი თანამშრომლების ორგანიზებითა და დაფინანსებით საქართველოში დანაშაულებრივი ქმედებების, მათ შორის პარტია „ქართული ოცნების“ საპატიო თავმჯდომარის, ბიძინა ივანიშვილის მკვლელობის მომზადების ფაქტზე მიმდინარეობს. სახელმწიფო უსაფრთხოების სამსახურში აცხადებენ, რომ აღნიშნული ქმედებების მიზანი ქვეყანაში არეულობის მოწყობა და ხელისუფლების ძალადობრივი გზით დამხობაა.