აშშ-ის ყოფილმა პრეზიდენტმა, დონალდ ტრამპმა აშშ-სა და რუსეთს შორის პატიმრების გაცვლის შესახებ დეტალების გასაჯაროება მოითხოვა.
„როდის აპირებენ რუსეთთან პატიმრების გაცვლის შესახებ დეტალების გამოქვეყნებას? რამდენ ადამიანს ვიღებთ მათ სანაცვლოდ? ჩვენ ამაში რუსებს ფულსაც ვუხდით? მკვლელებსა და ავაზაკებს ვათავისუფლებთ? უბრალოდ მაინტერესებს, რადგან ჩვენ არასდროს ვდებთ კარგ გარიგებებს, განსაკუთრებით მძევლების გაცვლაზე“, – აღნიშნა დონალდ ტრამპმა.
თურქეთის დედაქალაქ ანკარაში, რუსეთსა და დასავლეთის რიგ ქვეყნებს შორის პატიმართა გაცვლა შედგა.
„ბოლო წლების განმავლობაში ყველაზე მასშტაბური გაცვლის ოპერაცია, რომელშიც მონაწილეობდა შვიდი სხვადასხვა ქვეყნის (აშშ, გერმანია, პოლონეთი, სლოვენია, ნორვეგია, რუსეთი და ბელარუსი) ციხეებში მყოფი 26 პატიმარი, ხუთშაბათს ანკარაში თურქეთის ეროვნული დაზვერვის სამმართველოს შუამავლობით განხორციელდა“, – ნათქვამია თურქეთის ეროვნული დაზვერვის სამსახურის განცხადებაში.