სახელმწიფო უსაფრთხოების სამსახურის დაარსებიდან 9 წლის აღსანიშნავად სპეციალური ოპერაციების დეპარტამენტის ბაზაზე საჩვენებელ-საწვრთნელი ღონისძიება გაიმართა.
სახელმწიფო უსაფრთხოების სამსახურის უფროსმა გრიგოლ ლილუაშვილმა მებრძოლებს პროფესიული დღე მიულოცა და გაწეული სამსახურისთვის მადლობა გადაუხადა.
„პროფესიული დღე მივულოცეთ სახელმწიფო უსაფრთხოების სამსახურის სპეციალური ოპერაციების ცენტრს, რომელიც გახლავთ კონტრტერორისტული მიზნებისთვის არსებული ერთ-ერთი ელიტარული ქვედანაყოფი. ის აჩვენებს მომზადების და საბრძოლო განწყობის უმაღლეს დონეს. დანაყოფმა გვაჩვენა იმიტირებული სცენარები საბრძოლო მოქმედებებისა, რომლებიც აკმაყოფილებს საერთაშორისო სტანდარტებს”, – განაცხადა სახელმწიფო უსაფრთხოების სამსახურის უფროსმა გრიგოლ ლილუაშვილმა.
მან მებრძოლები დააჯილდოვა სამკერდე ნიშნით – „ღირსეული სამსახურისთვის“.
საჩვენებელ სწავლებაზე წარმოდგენილი იყო სპეცტექნიკა, სპეციალური საბრძოლო სატრანსპორტო საშუალებები, ასევე ვერტმფრენი, შესრულდა სხვადასხვა ოპერაცია.
ღონისძიებაზე პატივი მიაგეს სპეციალური ოპერაციების დეპარტამენტის გმირულად დაღუპულ მებრძოლთა ხსოვნას.