ახლო აღმოსავლეთში მოსალოდნელი ესკალაციის ფონზე ისრაელში აშშ-ის ცენტრალური სარდლობის მეთაური, გენერალი მაიკლ ერიკ კურილა ჩავიდა. ინფორმაცია ამის შესახებ ისრაელის თავდაცვის არმიის („ცაჰალის“) ტელეგრამ არხზეა გამოქვეყნებული.
ისრაელში ამერიკელი გენერალი ისრაელის გენერალური შტაბის მეთაურს, გენერალ-ლეიტენანტს ჰერცი ჰალევის შეხვდა. შეხვედრაზე გენერლებმა უსაფრთხოების გარემო შეაფასეს და ასევე ახლო აღმოსავლეთის რეგიონში არსებულ და სამომავლოდ მოსალოდნელ საფრთხეებზე რეაგირების მექანიზმებზე იმსჯელეს.
ინფორმაციის თანახმად, კურილა ეწვია მიწისქვეშა საჰაერო ძალების ოპერაციების ცენტრსაც, იქ არსებულ სიტუაციას გაეცნო და ისრაელის საჰაერო ძალების მეთაურს, გენერალ-მაიორს ტომერ ბარს შეხვდა. ეს კურილას უკვე მეორე ვიზიტია ისრაელში ბოლო ერთი კვირის მანძილზე.
კომენტარები