სამწუხაროდ არის მცდელობა იმის, რომ როგორმე ეს უზარმაზარი დანაშაული „ნაციონალურ მოძრაობას“ ჩამოერეცხოს, – ასე გამოეხმაურა ფრაქცია „ქართული ოცნების“ თავმჯდომარის პირველი მოადგილე, არჩილ გორდულაძე ქართული ოცნების პოლიტიკური საბჭოს მიერ დღეს გამოქვეყნებულ განცხადებას, რომელიც სხვა საკითხებთან ერთად აგვისტოს ომს ეხება.
„საზოგადოებას კიდევ უფრო მეტი კითხვა გაუჩნდებოდა, თუ რატომ დაეთანხმა „ნაციონალური მოძრაობა“ ტალიავინის დასკვნას. გასაგებია, რომ რუსეთი დაეთანხმებოდა დასკვნას, სადაც პირდაპირ წერია, რომ ქართველი ჯარისკაცების ქმედებებს მოჰყვა რუსეთის საპასუხო ქმედებები. ერთია პოლიტიკური განაჩენი, რომელიც უკვე რვაჯერ დადგა და მეორეა სამართლებრივი განაჩენი. რატომ წამოეგნენ და თუ წამოეგნენ პროვოკაციებს, რა გეგმა ჰქონდათ, როდესაც მათი ერთ-ერთი მაღალჩინოსანი ამბობდა, რომ 12-საათიანი გეგმა ჰქონდათ სამაჩაბლოში შესვლის, რომ 12 საათის შემდეგ შეძლებდა მხოლოდ რუსეთის ფედერაცია საზღვრის გადმოკვეთას და საჯარისო ნაწილების შემოყვანას. არსებობს მათი განცხადებები და ქმედებები, რაზეც პასუხი უნდა აგონ“, – აცხადებს გორდულაძე.
„აგვისტოს ომზე დასკვნის მომზადება ტალიავინს ევროკავშირმა დაუკვეთა და შვეიცარიელი დიპლომატი ომთან დაკავშირებულ მტკიცებულებებს სწორედ ამ უმაღლესი მანდატით აგროვებდა. აღნიშნულ მტკიცებულებებზე დაფუძნებულ ერთიან დასკვნას დაეთანხმნენ როგორც რუსეთი, ისე საქართველოს მაშინდელი ხელისუფლება, რითაც დასკვნაში მოცემული ფაქტების უტყუარობა ორივე მხარემ დაადასტურა“, – ამის შესახებ „ქართული ოცნების” პოლიტიკური საბჭოს მიერ გავრცელებულ განცხადებაშია ნათქვამი.