ისრაელის მთავრობის კანცელარია სამხედრო კაბინეტის ყოფილ წევრს ბენი განცს აშშ-სა და დიდ ბრიტანეთში არასანქცირებული ვიზიტების განხორციელებაში სდებს ბრალს და 70 ათასი შეკელის (18 ათასი დოლარი) გადახდას სთხოვს. ინფორმაციას ამის შესახებ ებრაული მედია ავრცელებს.
საქმე ეხება ვიზიტებს, რომელიც განცმა 2024 წლის მარტში განახორციელა. იმ დროს განცი ისრაელი მთავრობისა და სამხედრო კაბინეტის წევრი იყო. განცის ვიზიტებმა ისრაელის პრემიერ-მინისტრი ბენიამინ ნეთანიაჰუ გაანაწყენა. პრემიერის გარემოცვაში ამბობდნენ, რომ განცმა პროტოკოლი დაარღვია, რადგან კანონის თანახმად, ნებისმიერი მინისტრის ვიზიტი და ვიზის განრიგი პრემიერთან უნდა შეთანხმდეს.
ებრაული მედიის ცნობით, მარტის ვიზიტის დროს განცი აშშ-ის პრეზიდენტ ჯო ბაიდენთან შეხვედრას ცდილობდა, თუმცა უშედეგოდ. მას ვიცე-პრეზიდენტი კამალა ჰარისი და ბაიდენის მრჩეველი უსაფრთხოების საკითხებში ჯეიკ სალივანი შეხვდნმენ.
იმ ფაქტის გათვალისწინებით, რომ ნეთანიაჰუს იმ დროს ვაშინგტონში არ ეპატიჟებოდნენ, ის ნებისმიერი პოლიტიკოსის ვიზიტს ამერიკაში ნეგატიურად აღიქვამდა.
ვაშინგტონის შემდეგ განცი ლონდონში გაემგზავრა, სადაც შეხვედრები იმდროინდელ პრემიერ-მინისტრთან რიში სუნაკთან და საგარეო საქმეთა მინისტრთან დევიდ კემერონთან გამართა.
განცის გარემოცვაში ფიქრობენ, რომ ნეთანიაჰუ მას სჯის იმის გამო, რომ მან ივნისში სამხედრო კაბინეტი დატოვა.