ჩვენი ქვეყნის ინტერესის საწინააღმდეგოდ არის მიმართული ამ ორგანიზაციის [„ნედის“] ქმედებები. სწორედ ამიტომ პარლამენტის თავმჯდომარემაც არაერთხელ მოუწოდა ამ ორგანიზაციას, რომ გაესაჯაროებინა ვის, რა თანხებით აფინანსებს და რა მოქმედებებისკენ არის მიმართული ეს თანხები, – ასე გამოეხმაურა ფრაქცია „ქართული ოცნების“ თავმჯდომარის პირველი მოადგილე, არჩილ გორდულაძე ჩინეთის საგარეო საქმეთა სამინისტროს მიერ მომზადებულ მწვავე ანგარიშს.
მისი თქმით, „დემოკრატიის ეროვნული ფონდის” მიმართ კითხვები არსებობს.
„საზოგადოებას არასდროს დაავიწყდება „ისფედის“ მიერ ჩადენილი დანაშაული, რომელიც ეხებოდა პარალელური ხმის დათვლის გაყალბებას, რომელმაც ჩვენს ქვეყანაში დესტაბილიზაცია გამოიწვია, მათ შორის გადატრიალების მცდელობასაც ჰქონდა ადგილი. ჩვენ გვახსოვს, რომ ამ ორგანიზაციას პირდაპირ „ნედი“ აფინანსებს და არსებობს კითხვები ამ ორგანიზაციის მიმართ. ახლაც, როდესაც, ბიძინა ივანიშვილისთვის ჩირქის მოსაცხებად ე.წ. ჟურნალისტური გამოძიება ჩატარდა, თითქოს ბიძინა ივანიშვილმა ოკუპანტ ქვეყანაში შეიძინა გარკვეული ფართები, ცალსახა ტყუილია. როგორც ამ ორგანიზაციას, ასევე „გამჭვირვალობა საქართველოს“ და კაპიტან გიგაურს „ნედი“ აფინანსებს. ჩვენთვის მიუღებელია, რომ ნებისმიერმა მხარემ თანხები ჩაასხას ქვეყანაში და მოწოდებული იყოს ჩვენს ქვეყანაში დესტაბილიზაციისკენ“, – აღნიშნა გორდულაძემ.