სიცილიასთან, იახტა Bayesian-ის ჩაძირვისას დაკარგული 5 ადამიანის ცხედარი აღმოაჩინეს.
როგორც BBC წერს, მყვინთავებმა ცხედრებს ჩაძირული იახტის კაიუტებში მიაგნეს. ისინი კიდევ ერთ დაკარგულ ადამიანს ამ დრომდე ეძებენ. იტალიის პოლიციაში ჯერ არ დაუდასტურებიათ, ვისი ცხედრები იპოვეს, თუმცა ცნობილია რომ დაკარგულებს შორის ბრიტანეთის 4 და აშშ-ის 2 მოქალაქე იყო, მათ შორის მილიარდერი მაიკ ლინჩი, მისი ქალიშვილი ჰანა, Morgan Stanley-ს საერთაშორისო ბანკის ხელმძღვანელი ჯონათან ბლუმერი და მისი მეუღლე ჯუდი.
უამინდობის გამო იახტის ჩაძირვის შესახებ 19 აგვისტოს გახდა ცნობილი. ინციდენტის დროს ბორტზე 22 ადამიანი იმყოფებოდა. მაშველებმა 15 ადამიანი, მათ შორის 1 წლის ბავშვი გადაარჩინეს.
მედიის ცნობით, კრუიზში წასვლა ლინჩის იდეა იყო. მან ოჯახთან და მეგობრებთან ერთად სასამართლო დავის მოგების აღნიშვნა გადაწყვიტა. 10 წლის განმავლობაში ბიზნესმენი Hewlett Packard-თან იყო ჩაბმული დავაში, რომელმაც 2012 წელს მისი კომპანია Autonomy იყიდა და ლინჩი საბუთების გაყალბებაში დაადანაშაულა. ამასთან, საქმეზე ლინჩის თანამოპასუხე სტივენ ჩემბერლეინი შაბათს ავტოკატასტროფაში დაიღუპა.