უკრაინაში დონეცკის ოლქში, სადაც სამხედრო ბრძოლები მიმდინარეობს, ვითარება სულ უფრო რთულდება. ინფორმაციას უკრაინული საინფორმაციო სააგენტო Unian.net ავრცელებს.
გამოცემას ორგანიზაცია DeepState-ის ერთ-ერთი დამფუძნებლისა და ანალიტიკოსის რომან პოგორელის განცხადება მოჰყავს მაგალითად.
„მტერმა ნოვოგროდოვკა დაიკავა და მანდ გამაგრებას ცდილობს, კერძოდ მრავალსართულიან შენობებში. ის აგრეთვე ცდილობს გარღვევას და საკუთარი პოზიციების გაძლიერებას. რუსები სამხრეთით, პტიჩიის რაიონში მიიწევენ წინ“, – ამბობს პოგორელი.
როგორც ექსპერტი აცხადებს, პტიჩიის სამხრეთ-დასავლეთით ერთ-ერთი საკვანძო სიმაღლე მდებარეობს. რუსებს ამ სიმაღლის აღებაც უნდათ.
„თუ რუსები ამ სიმაღლეს დაიკავებენ, ეს უკრაინელ ჯარისკაცებს, რომლებიც მდინარე ვოლჩიას დაბლობზე იმყოფებიან, სერიოზულ პრობლემებს შეუქმნის. სიტუაციის სტაბილიზაცია ჯერ ვერ ხერხდება. რაიონში რუსეთის პირადი შემადგენლობის წარმოუდგენელი რაოდენობაა გაშლილი“, – დასძინა ანალიტიკოსმა.
ბრიგადა „რუბეჟ“-ის დაგეგმარების სექციის ოფიცერმა, მაიორმა დიმიტრი კოჟუბენკომ, თავის მხრივ, აღნიშნა, რომ თუ რუსები პოკროვსკის დასახლებულ პუნქტს დაიკავებენ, უკრაინის შეიარაღებული ძალები კიდევ ერთ ლოგისტიკურ მარშრუტს დაკარგავენ.