აშშ-ის წარმომადგენელთა პალატის ზედამხედველობის კომიტეტის თავმჯდომარემ, ჯეიმს კომერმა განაცხადა, რომ პასუხისმგებლობა უნდა დადგეს აშშ-ის მთავრობის იმ წარმომადგენლებისთვის, რომლებმაც Facebook-ი აიძულეს, ცენზურა დაეწესებინა კონსერვატიულ მოსაზრებებზე.
კომპანია Meta-ს დამფუძნებელმა და აღმასრულებელმა დირექტორმა, მარკ ცუკერბერგმა ორშაბათს აშშ-ის კონგრესის წარმომადგენელთა პალატის იურიდიულ საკითხთა კომიტეტის თავმჯდომარეს, ჯიმ ჯორდანს წერილი მისწერა, რომელშიც ნათქვამია, რომ პრეზიდენტ ჯო ბაიდენის ადმინისტრაცია COVID-19 თემის გამო მასზე და მის გუნდზე ზეწოლას ახდენდა.
საქმე ეხება 2021 წლის მოვლენებს. როგორც ცუკერბერგი წერს, მას პრეზიდენტ ბაიდენის ადმინისტრაციის მაღალჩინოსნები დაუკავშირდნენ და COVID-19-თან დაკავშირებული კონტენტის, იუმორისა და სატირის ჟანრის ინფორმაციის ჩათვლით, ცენზურას სთხოვეს.
„მიხარია, რომ ცუკერბერგმა ამის შესახებ ისაუბრა. თუმცა, საბოლოოდ, პასუხისმგებლობა უნდა დადგეს აშშ-ის მთავრობის იმ წარმომადგენლებისთვის, რომლებმაც Facebook-ი აიძულეს, ცენზურა დაეწესებინა კონსერვატიულ მოსაზრებებზე. განსაკუთრებით ისეთი ამბების გათვალისწინებით, როგორიცაა ჰანტერ ბაიდენის ლეპტოპის ამბავი, როდესაც მათ იცოდნენ, რომ ეს სიმართლე იყო“, – აღნიშნა ჯეიმს კომერმა.
„ცუკერბერგისა და Facebook-ის ხელმძღვანელობის შემდეგი ნაბიჯები იქნება FBI-სა და ბაიდენისა და ჰარისის ადმინისტრაციაში კონკრეტული პირების იდენტიფიცირება, რომლებიც მათ კონსერვატორების ცენზურისკენ უბიძგებდნენ“, – დასძინა მან.