თურქეთის პრეზიდენტი რეჯეფ თაიფ ერდოღანი აცხადებს, რომ ნატო-ში უკრაინის მიწვევა არ არის საკითხი, რომელთან დაკავშირებითაც სიჩქარეა საჭირო. მისი თქმით, აშშ-სა და ალიანსის ზოგიერთ ქვეყანას არ სურს, უკრაინა იყოს ნატო-ს წევრი.
ამის შესახებ ერდოღანმა NBC News-თან ინტერვიუში განაცხადა.
„ეს არ არის ის საკითხები, რომლებიც უნდა დაჩქარდეს. და როდესაც ჩვენ ვიღებთ გადაწყვეტილებებს, ყოველთვის ვითვალისწინებთ ნატო-ს სხვა წევრი ქვეყნების პოზიციებს, ჩვენ განვიხილავთ ყველა შესაძლო საკითხს მოლაპარაკებების მაგიდასთან და შესაბამისად ვიღებთ საბოლოო გადაწყვეტილებას“, – განაცხადა თურქეთის ლიდერმა.
ამავე ინტერვიუში რეჯეფ თაიფ ერდოღანმა აღნიშნა, რომ თურქეთსა და რუსეთს შორის ურთიერთობები ფართოვდება.
„ჩვენი ურთიერთობები რუსეთთან მრავალგანზომილებიანი, პოლიტიკური, ეკონომიკურია, ასევე დაკავშირებულია თავდაცვით ინდუსტრიასთან. ამ ურთიერთობებს მრავალი განზომილება აქვს, ჩვენი კავშირები გრძელდება და ეკონომიკურად ეს ურთიერთობები ყოველდღიურად ფართოვდება“, – განაცხადა რეჯეფ თაიფ ერდოღანმა.
შეგახსენებთ, უკრაინის პრეზიდენტის ოფისის ხელმძღვანელმა, ანდრეი ერმაკმა განაცხადა, რომ პრეზიდენტ ზელენსკის მიერ შემუშავებული „გამარჯვების გეგმა“ უკრაინის ნატო-ში მიწვევას მოიცავს.