დღეს ჩვენ ვხსნით კახეთის 4-ზოლიანი მაგისტრალის 85 კმ-იანი მონაკვეთიდან 35 კმ-იან ჩქაროსნულ გზას, რომელიც ფარავს თბილისიდან საგარეჯომდე მონაკვეთს, რაც ძალიან მნიშვნელოვანი წინგადადგმული ნაბიჯია კახეთის მაგისტრალის მშენებლობაში, – ამის შესახებ საქართველოს პრემიერ-მინისტრმა ირაკლი კობახიძემ კახეთის 4-ზოლიანი მაგისტრალის პირველი 35 კმ-იანი მონაკვეთის გახსნის ღონისძიებაზე სიტყვით გამოსვლისას განაცხადა.
როგორც მთავრობის მეთაურმა აღნიშნა, ახალი მაგისტრალი გვერდს უვლის მჭიდროდ დასახლებულ 4 სოფელსა და ქალაქს, რაც სრულად განტვირთავს მოძრაობას დასახლებებში, უზრუნველყოფს საგზაო უსაფრთხოების უმაღლეს სტანდარტებს, გაანახევრებს გადაადგილების დროს და სამჯერ გაზრდის ტრანსპორტის გამტარობას.
კახეთის მაგისტრალის ყველა მონაკვეთის დასრულების შემდეგ, თბილისიდან თელავამდე მგზავრობას მხოლოდ 1 საათი და 20 წუთი დასჭირდება.
მთავრობის მეთაურის თქმით, თუ 2012 წელს აშენებული იყო მხოლოდ 68 კმ მაგისტრალური გზა, დღეისათვის უკვე გახსნილია 4-ჯერ მეტი – 341 კმ მაგისტრალური გზა. და მხოლოდ წელს გაიხსნება იმაზე მეტი მაგისტრალური გზა, ვიდრე 2012 წლამდე მთლიანად ფუნქციონირებდა ქვეყანაში.
„ეს მიღწევები ცხადყოფს, რომ ჩვენ ყველაფერს ვაკეთებთ საქართველოს საერთაშორისო სატრანსპორტო პოტენციალის სრულად განვითარებისათვის, დაკავშირებადობის გაუმჯობესებისთვის, ქვეყნის რეგიონულ ლოგისტიკურ ცენტრად ჩამოყალიბებისთვის, ტურიზმისა და ბიზნეს შესაძლებლობების სტიმულირებისა და მოსახლეობის ეკონომიკური გაძლიერებისთვის. ეს ძალიან ბევრი ადამიანის შრომის შედეგია“, – განაცხადა ირაკლი კობახიძემ და პროექტის განხორციელებაში ჩართულ ყველა ადამიანს მადლობა გადაუხადა.
თბილისი-საგარეჯოს მაგისტრალური გზის მშენებლობა სახელმწიფო ბიუჯეტიდან 533 502 661 ლარით დაფინანსდა.
