“ევროატლანტიკური ოჯახის წევრობა არის განუყოფელი ნაწილი ჩვენი ხედვისა საქართველოს მომავლის და ეს არის ქართველი ხალხისა და საქართველოს სახელმწიფოს სუვერენული გადაწყვეტილება, – ამის შესახებ პრემიერ-მინისტრმა გიორგი კვირიკაშვილმა ნატო-საქართველოს სახალხო დიპლომატიის ორდღიანი ფორუმის გახსნაზე განაცხადა.
სიტყვით გამოსვლისას პრემიერი 9 აპრილს შეეხო და აღნიშნა, რომ 28 წლის წინ ათობით ქართველმა ახალგაზრდამ, საკუთარი სიცოცხლე გაწირა მსხვერპლად საქართველოს დამოუკიდებლობისთვის ბრძოლაში.
”მივესალმები ნატოს სახალხო დიპლომატიის ფორუმის გამართვას საქართველოში.სამწუხაროდ, ამინდი არის ზუსტად ისეთი, როგორც გამოწვევები ჩვენს რეგიონში. იმედი მაქვს, დღის მეორე ნახევარში და ხვალ ამინდი იქნება ისეთი, რომ ჩვენმა სტუმრებმა შეძლონ თბილისის ლამაზი ხედებით მოხიბლვა, ვინაიდან ჩვენ მართლაც ულამაზესი ქალაქი გვაქვს, რომელიც, დარწმუნებული ვარ, ყველა სტუმრისთვის ძალიან მიმზიდველია. გუშინ იყო ძალიან მნიშვნელოვანი დღე – 9 აპრილი. 28 წლის წინ, ათობით ქართველმა ახალგაზრდამ, საკუთარი სიცოცხლე მიიტანა მსხვერპლად საქართველოს დამოუკიდებლობისთვის ბრძოლაში, ხოლო ორი წლის თავზე, 1991 წლის 31 მარტს ჩატარდა რეფერენდუმი, რომელზეც საქართველოს მოსახლეობამ, აფხაზეთის და ცხინვალის რეგიონის მოსახლეობის ჩათვლით, ხმა მისცა საქართველოს დამოუკიდებლობას, რომელიც შემდგომ უკვე 1991 წლის 9 აპრილს დადასტურდა მაშინდელი პარლამენტის გადაწყვეტილებით. ძალიან დიდი იმედი მაქვს საქართველო ააშენებს ისეთ მომავალს რომელზეც ოცნებობდნენ ის ახალგაზრდები, რომლებმაც სიცოცხლე შესწირეს საქართველოს დამოუკიდებლობას. ევროატლანტიკური ოჯახის წევრობა არის განუყოფელი ნაწილი ჩვენი ხედვისა საქართველოს მომავლის და ეს არის ქართველი ხალხისა და საქართველოს სახელმწიფოს სუვერენული გადაწყვეტილება. დიდი იმედი მაქვს, ეს გადაწყვეტილება აუცილებლად აღსრულდება. სახალხო დიპლომატიის ფორუმი არის განუყოფელი ნაწილი იმ ინტეგრაციის პროცესისა, რომელშიც ვიმყოფებით.
პრემიერმა მადლობა გადაუხადა ყველას, ვინც მტკიცედ და უჭერს მხარს ჩვენი ქვეყნის დემოკრატიულ განვითარებას და გვერდში უდგას საქართველოს ალიანსში გაწევრიანების გზაზე”, – განაცხადა პრემიერ-მინისტრმა.
მისივე თქმით, ნატოს სახალხო დიპლომატიის ფორუმს თბილისი წელს მეორედ მასპინძლობს და ეს კიდევ ერთი დამადასტურებელი ფაქტია, რომ საქართველოს აქვს ძალიან მტკიცედ მიღებული გადაწყვეტილება, რომ ეს ინტეგრაციის პროცესი გახადოს შეუქცევადი.
”ეს ასევე ადასტურებს იმას რომ საქართველოს ნატოსთან ინტეგრაციის პროცესი უფრო და უფრო ღრმა ხდება”, – აღნიშნა პრემიერმა.