საქართველოს პრემიერმინისტრი გიორგი კვირიკაშვილი მსახიობ გივი ბერიკაშვილის გარდაცვალების გამო მწუხარებას გამოთქვამს. გიორგი კვირიკაშვილის სამძიმრის წერილში ნათქვამია, რომ გივი ბერიკაშვილის ცხოვრება მთლიანად იყო დაკავშირებული ქვეყანასთან და ხალხთან.
“ღრმა მწუხარებას გამოვთქვამ მთელი ჩვენი ქვეყნისთვის საყვარელი ადამიანის და ნამდვილი სახალხო არტისტის გივი ბერიკაშვილის გარდაცვალების გამო. გივი ბერიკაშვილმა ქართულ კინოსა და თეატრში დაუვიწყარი სახეები შექმნა. ძალიან დასანანია, რომ თანამედროვე ქართული კულტურის მოღვაწეთა შესანიშნავ პლეადას ღირსეული წარმომადგენელი გამოაკლდა. ბატონი გივის ცხოვრება მთლიანად იყო დაკავშირებული თავის ქვეყანასთან, ხალხთან. ის იყო დიდი პატრიოტი და მოქალაქე. გულწრფელად თანავუგრძნობ ბატონი გივის ოჯახს, ახლობლებს, მთელ საქართველოს ამ დიდი დანაკლისის გამო.”- ნათქვამია პრემიერმინისტრის განცხადებაში.